ऐन गणेशोत्‍सवात धारावीत पाणीबाणी
रहिवाशांवर विकतचे पाणी घेण्याची पाळी
धारावी, ता. २६ (बातमीदार) : धारावीत गेल्या काही दिवसांपासून अनेक विभागात पालिकेतर्फे पुरवठा केल्या जाणाऱ्या पिण्याच्या पाण्याची टंचाई निर्माण झाली आहे. ढोरवाडा, गांधी मैदान, बसवेश्वर नगर, महाराणा प्रताप (एमपी) नगर आदी वस्त्यांमध्ये पाणीपुरवठा विस्कळित झाल्याने स्थानिक रहिवासी हवालदिल झाले आहेत. रहिवाशांना इतर विभागातून पाणी आणावे लागत आहे, तर अनेकांना पाण्याच्या बाटल्या विकत घ्याव्या लागत आहेत.
मुंबईत जोरदार पाऊस कोसळतोय व मुंबईला पाणीपुरवठा करणारे तलाव भरून ओसंडून वाहत आहेत. तरीही धारावीतील रहिवाशांच्या घशाला कोरड पडली आहे. घरोघरी श्रीगणरायाचे आगमन होत असताना पाणीपुरवठा विस्‍कळित झाल्‍याने स्थानिकांच्या चितेंत भर पडली आहे. नियमित व स्वच्छ पाणीपुरवठा करण्याची सुबुद्धी पालिकेला दे, असे साकडे आम्ही गणरायाकडे घालणार आहोत, असे स्थानिक रहिवासी व सामाजिक कार्यकर्त्या संध्या सोनवणे-डोईफोडे यांनी सांगितले.
घरातील व विभागातील नळांना नियमित पाणीपुरवठा होत नसल्याने घरोघरी चिंतेचे वातावरण आहे. धारावीतील काही भागांमध्ये कमी दाबाने व काही वेळच पाणी येत आहे. अनेक विभागात पाणी कमी दाबाने येणे आणि वेळेच्या आधीच पाणीपुरवठा बंद होणे, असे प्रकार घडत आहेत. जलवाहिन्या जुन्या झाल्याने पालिकेने धारावीतील काही विभागात नवीन जलवाहिनी टाकली आहे. तरीही पाण्याचा प्रश्न सुटलेला नाही. घारावीत सकाळ, दुपारी व संध्याकाळी पिण्याचे पाणी वितरित केले जाते. प्रत्येक ठिकाणी नळाला पाणी आल्यावर किमान १० मिनिटे सुरुवातीला पाण्याला दुर्गंधी येत असल्याच्या तक्रारी आहेत.