खारघरवासीयांची कृत्रिम तलावाला अधिक पसंती
खारघर, ता. १ (बातमीदार) : खारघरमधील बहुतांश गणेशभक्तांनी गणेश विसर्जनासाठी कृत्रिम तलावाला अधिक पसंती दिल्याचे दिसत असून, दीड आणि पाच दिवसांचे मिळून १,२३० भक्तांनी कृत्रिम तलावात गणपती विसर्जन केल्याचे प्रभाग अधिकाऱ्यांनी सांगितले.
पनवेल पालिका प्रशासनाने पर्यावरणपूरक गणेशोत्‍सव साजरा व्हावा, याविषयी आवाहन केले होते. त्यामुळे खारघरवासीयांनी यावर्षी पर्यावरणपूरक गणेशमूर्ती आपल्या घरी बसवलेल्या पाहायला मिळाल्या. गणपती विसर्जनासाठी पालिकेने खारघर सेक्टर- ३४ साई मन्नत, हाईड पार्क, स्वप्नपूर्ती व व्हॅलीशिल्प सेक्टर- ११ खेळाचे मैदान, सेक्टर-१४ कामधेनू इमारतीलगत, ग्राम विकास भवनासमोर, गावदेवी मैदान, सेक्टर-४, ६, ७ आणि सेक्टर-१५ स्वर्ण गंगा ज्वेलर्स शेजारी, सेक्टर -१६ येथे कृत्रिम तलावाची निर्मिती केली आहे. कृत्रिम तलावात गणपती विसर्जन करणाऱ्या गणेशभक्तांना पालिकेकडून प्रशस्‍तिपत्र दिले जात आहे. गौरी आणि अनंत चतुर्दशीच्या दिवशी कृत्रिम तलावात विसर्जनाला अधिक प्रतिसाद मिळेल, अशी शक्‍यता वर्तवण्यात येत आहे.