कासा, ता. ९ (बातमीदार) : डहाणू आणि तलासरी तालुक्यातील आदिवासी १७ संवर्ग पेसा कर्मचारी संघटनेच्या शिक्षक बांधवांनी आमदार विनोद निकोले यांची भेट घेऊन आपल्या अडचणी मांडल्या. आदिवासी भागात कार्यरत असलेल्या शिक्षकांसाठी सरकारी आदेश (जीआर) काढण्यात आल्याची माहिती देत शिक्षकांनी हा निर्णय तत्काळ रद्द करण्याची मागणी केली.

आमदार निकोले यांनी यासंदर्भात पालघरचे मुख्य कार्यकारी अधिकारी मनोज रानडे यांच्याशी दूरध्वनीवर चर्चा केली. त्यांनी अशा प्रकारचा कोणताही शासन निर्णय झालेला नसल्याचे स्पष्ट केले. तसेच, भविष्यात या विषयावर काही आदेश आले, तर लोकप्रतिनिधींशी चर्चा करूनच पुढील प्रक्रिया राबविण्यात येईल, असे आश्वासन दिले. ज्ञानदानाचे पवित्र कार्य करणाऱ्या शिक्षक बांधवांवर कोणत्याही प्रकारचा अन्याय होऊ देणार नाही. त्यांच्या अडचणी सोडविण्यासाठी मी स्वतः पुढाकार घेईन, असे आश्वासन आमदार विनोद निकोले यांनी दिले. या भेटीत अनेक शिक्षक बांधवांसह पेसा कर्मचारी संघटनेचे पदाधिकारी उपस्थित होते.