कासा, ता. १० (बातमीदार) : डहाणू तालुकास्तरीय शालेय बुद्धिबळ स्पर्धा के. डी. हायस्कूलमध्ये मंगळवारी (ता. ९) उत्साहात पार पडली. क्रीडा व युवक सेवा संचालनालय, पालघर जिल्हा क्रीडा अधिकारी कार्यालय व जिल्हा क्रीडा परिषद यांच्या संयुक्त विद्यमाने या स्पर्धेचे आयोजन करण्यात आले होते. १४ वर्षांखालील गटात तीर्थ जैन आणि श्रुती सूर्यवंशी विजेती ठरली.

१४, १७ व १९ वर्षे वयोगटातील या स्पर्धेत तालुक्यातील विविध शाळांमधील ३०३ विद्यार्थी-विद्यार्थिनींनी सहभाग नोंदवला. स्पर्धेच्या उद्‍घाटनप्रसंगी प्रमुख पाहुण्यांनी विद्यार्थ्यांना प्रेरणादायी संदेश दिला. स्पर्धेत उत्तम कामगिरी करणाऱ्या खेळाडूंनी डहाणू तालुक्याचे प्रतिनिधित्व जिल्हास्तरीय स्पर्धेत करणार आहेत. १४ वर्षांखालील मुलांच्या गटात सेंट मेरी स्कूलचा तीर्थ जैन, तर मुलींमध्ये श्रुती सूर्यवंशी (एचएम पारेख) हिने प्रथम क्रमांक पटकावला. १७ वर्षांखालील गटामध्ये मुलांमध्ये शिरीन दिनयार शाळेचा स्पर्श पाटील, तर मुलींमध्ये एच.एम. पारेख शाळेची स्मेरा गोहिलने बाजी मारली.

१९ वर्षांखालील गटामध्ये मुलांमध्ये बीएमटी वाणगाव शाळेचा वंश चौरसिया, तर मुलींमध्ये के.एल. पोंदा शाळेतील जीनल माच्छी यांनी प्रथम क्रमांकाचे पारितोषिक जिंकले. या स्पर्धेत तालुक्यातील विविध शाळांमधील स्पर्धकांनी सहभाग घेतल्याने विद्यार्थ्यांमध्ये उत्साहाचे वातावरण पाहायला मिळाले.