डोंबिवलीत दोन रिक्षाचालकांवर गुन्हे
सकाळ वृत्तसेवा
डोंबिवली, ता. ११ : रेल्वेस्थानकाजवळील महात्मा गांधी या सर्वाधिक वर्दळीच्या रस्त्यावर वाहतुकीला अडथळा ठरणाऱ्या तसेच नागरिकांच्या जीविताला धोका होईल, अशा पद्धतीने रिक्षा उभी करणाऱ्या दोन रिक्षाचालकांच्या विरुद्ध विष्णुनगर पोलिसांनी फौजदारी गुनहे दाखल केले आहेत. ऋतिक सुरेश वाकोडे (वय २१), अविनाश दिलीप भालेराव (२२) अशी गुन्हा दाखल रिक्षाचालकांची नावे आाहेत. ऋतिक हा जुनी डोंबिवलीतील नेमाडेगल्ली भागात राहतो, तर अविनाश हा उमेशनगरमध्ये राहतो.

दोन दिवसांपूर्वी विष्णुनगर पोलिस ठाण्याचे सहाय्यक पोलिस उपनिरीक्षक सोळंके, हवालदार थोरात, विसपुते, थोरात, श्रीराम मिसाळ डोंबिवली पश्चिम रेल्वेस्थानक भागात गस्त घालत होते. त्या वेळी त्यांना रसरंजन हॉटलसमोरील मुख्य वर्दळीच्या रस्त्यावर ऋतिक वाकोडे आणि अविनाश भालेराव हे रस्ता अडवून रिक्षा उभी केल्याचे दिसले. या दोन्ही रिक्षामुळे रस्त्यावरील वाहनांना अडथळा येत होता; मात्र तरीही वाकोडे, भालेराव रिक्षा बाजूला घेत नव्हते. हा प्रकार विष्णुनगर पोलिस ठाण्याचे गस्ती पथक सहाय्यक उपनिरीक्षक सोळंके यांच्या निदर्शनास आला. त्यांनी या दोन्ही रिक्षा चालकांना बाजुला घेतले. अशाप्रकारे रस्त्यावर रिक्षा उभी करून तुम्ही वाहतुकीला अडथळा आणि वेगात असलेल्या वाहनांतील प्रवाशांच्या जीविताला धोका निर्माण करत आहात असे सांगितले. या दोन्ही रिक्षाचालकांना समज देऊन हवालदार श्रीराम मिसाळ यांच्या तक्रारीवरून पोलिसांनी रिक्षाचालक ऋतिक वाकोडे, अविनाश भालेराव यांच्यावर गुन्हे दाखल केले.