काठमांडू, पोखरा येथे अडकलेले प्रवासी परतीच्या वाटेवर
मुरबाड, ता. ११ (बातमीदार) : मुरबाड तालुक्यातून नेपाळमध्ये पर्यटनासाठी गेलेल्या १०५ पर्यटकांनी परतीचा प्रवास सुरू केला आहे. सर्व प्रवासी सुखरूप आहेत, अशी माहिती मुरबाड तालुक्यातील सामाजिक कार्यकर्ते रामभाऊ दळवी यांनी पोखरा येथून परत निघताना ‘सकाळ’शी बोलताना दिली.
पोखरा येथून गुरुवारी (ता. ११) सकाळी ११ वाजता ६५ प्रवासी बसद्वारे परतीच्या प्रवासाला लागले आहेत. त्यामध्ये ३० महिलांचा समावेश आहे. हे सर्व प्रवासी सायंकाळी सोनोली बॉर्डर येथून भारतात प्रवेश करणार आहेत. तर काठमांडू येथूनही मुरबाड तालुक्यातील ४० प्रवाशांना घेऊन एक बस परतीच्या प्रवासाला लागली आहे. ही बससुद्धा सोनोली बॉर्डरमार्गे भारतात परत येणार आहे, असेही दळवी यांनी सांगितले.
दरम्‍यान, बुधवारी (ता. १०) रात्री महाराष्ट्र राज्याचे उपमुख्यमंत्री एकनाथ शिंदे यांनी मोबाईलवर रामभाऊ दळवी यांच्याशी संपर्क साधून त्यांना धीर दिला आणि लवकरच भारतात परत येण्याची व्यवस्था केली जाईल, असे आश्वासन दिले होते.