अतिरिक्त आयुक्तांकडून रस्ते दुरुस्तीच्या कामांची पाहणी
रस्ते दुरुस्तीची कामे तातडीने करण्याबाबत संबंधितांना दिल्या सूचना
पनवेल, ता. ११ (बातमीदार) ः पालिका कार्यक्षेत्रातील खारघर प्रभागातील सेक्टर-३५, तळोजा गाव, कोयनावळे येथील रस्ते दुरुस्तीची गुरुवारी (ता. ११) अतिरिक्त आयुक्त गणेश शेटे यांनी प्रत्यक्ष पाहणी केली. ही कामे तातडीने करण्याबाबत सूचना आयुक्तांनी संबंधित विभागाच्या अधिकाऱ्यांना दिल्या आहेत.
आयुक्त मंगेश चितळे यांनी खराब झालेल्या रस्त्यांची दुरूस्ती लवकरात लवकर करण्याबाबत सूचना दिल्या आहेत. त्यानुसार अतिरिक्त आयुक्त गणेश शेटे यांनी खारघर प्रभागातील तळोजा गाव, कोयनावळे येथील रस्त्यांची प्रत्यक्ष पाहणी केली व तत्काळ रस्ते दुरुस्ती करण्याबाबत संबंधित विभागाच्या अधिकाऱ्यांना सूचना दिल्या. या वेळी प्रभाग अधीक्षक जितेंद्र मढवी, अभियंता प्रकाश दोडे, महापालिका अधिकारी व संबंधित ठेकेदार, कर्मचारी उपस्थित होते.
सध्या महापालिका कार्यक्षेत्रातील चारही प्रभागातील रस्ते दुरुस्तीची कामे युद्ध पातळीवर सुरू आहेत. यामध्ये खारघर प्रभागात खारघर रेल्वेस्थानक रोड, सेक्टर-६, उत्सव चौक ते गुरूद्वारा, शिल्प चौक, तळोजा गाव, कोयनावळे, पालेखुर्द अशा विविध भागात रस्ते दुरुस्तीची कामे वेगाने केली जात आहेत. नागरिकांची गैरसोय होऊ नये यासाठी महापालिकेच्या बांधकाम विभागाच्या कनिष्ठ अभियंताशी संपर्क साधावा, असे आवाहन करण्यात आले आहे.

तक्रारी असल्यास संपर्काचे आवाहन
१. राहुल जाधव, कळंबोली, मो.नं. ८२३७२०८४२५
२. मयूर गडकरी, खारघर, मो.नं. ९१३७२११४९९
३. प्रतीक आंग्रे, नवीन पनवेल, मो.नं. ९३२११४१०७२
४. किरण पाटील, मो.नं. ९६६४५३८२०९