अखेर रमेश गायचोर यांची
तात्पुरत्या जामिनावर सुटका

विलंबाबाबत तळोजा कारागृह अधीक्षकांचा माफीनामा 

सकाळ वृत्तसेवा,
मुंबई, ता. ११ : शहरी नक्षलवाद प्रकरणात अटकेत असलेले कबीर कला मंचचे रमेश गायचोर यांची तात्पुरत्या जामिनावर सुटका करण्यात आली आहे. आजारी वडिलांना भेटण्यासाठी त्यांना ही मुभा देण्यात आली आहे, अशी माहिती तळोजा कारागृह प्रशासनाकडून गुरुवारी (ता. ११) उच्च न्यायालयाला दिली. आदेशाच्या अंमलबजावणीत झालेल्या विलंबाबाबत कारागृह अधीक्षकांनी न्यायालयात माफीनामाही सादर केला. 

न्यायालयाकडून गायचोर यांना तात्पुरता जामीन मंजूर केला असतानाही त्यांची कारागृहातून सुटका न केल्यावरून न्यायालयाने बुधवारी कारागृह प्रशासनाला धारेवर धरले होते. तसेच तुम्ही माणुसकी धाब्यावर बसवली आहे का, असा संतप्त सवाल न्यायालयाने केला होता. त्यानंतर सरकारी वकिलांनी न्यायालयाची माफी मागून न्यायालयात अधिकाऱ्याचा माफीनामा असलेले प्रतिज्ञापत्र देण्यात येईल, असे आश्वासन दिले होते. त्या पार्श्वभूमीवर न्या. अजय गडकरी आणि न्या. रणजितसिंह भोसले यांच्या खंडपीठापुढे गुरुवारी सुनावणी झाली. त्या वेळी गायचोर यांची बुधवारी रात्री उशिरा सुटका केल्याची माहिती सरकारी वकिलांनी न्यायालयाला दिली. न्यायालयाच्या आदेशाच्या अंमलबजावणीसाठी झालेल्या विलंबाबाबत माफी मागणारे कारागृह अधीक्षकांचे प्रतिज्ञापत्रही दाखल केले. ते स्वीकारून न्यायालयाने आपल्या आधीच्या आदेशात बदल करून गायचोर यांना १३ सप्टेंबरपर्यंत तात्पुरता जामीन मंजूर केला. याप्रकरणी बुधवारी झालेल्या सुनावणीच्या वेळी न्यायालयाने कारागृह प्रशासनाला धारेवर धरले हाेते.