''माऊंट मेरी'' यात्रेसाठी बेस्टच्या जादा बस
मुंबई ता. १३ : वांद्रे (पश्चिम) येथील प्रसिद्ध ''माऊंट मेरी यात्रा'' रविवारी (ता. १४) सुरू होणार असून २१ सप्टेंबरपर्यंत चालणार आहे. या यात्रेसाठी मोठ्या प्रमाणावर भाविक येतात. यामुळे प्रवाशांच्या सोयीसाठी बेस्ट उपक्रमातर्फे विशेष नियोजन करण्यात आले आहे. यात्रेदरम्यान वांद्रे स्थानक (प) ते हिलरोड उद्यान दरम्यान ३७४ अतिरिक्त बसगाड्या चालवण्यात येणार आहेत. ३२१-मर्या., ए-२०२, ए-३७५, ए-४२२, ए-४७३, सी-७१, सी-५०५ या मार्गावर अतिरिक्त बस चालविण्यात येणार आहेत.

माऊंट मेरी चर्च व फादर अ‍ॅग्नेल आश्रम परिसरात प्रचंड गर्दी होत असल्याने या अतिरिक्त बसगाड्यांचे प्रवर्तन थेट चर्चपर्यंत करता येणार नाही. त्यामुळे त्या वांद्रे स्थानक (प) ते हिलरोड उद्यान दरम्यान धावतील. तसेच, वांद्रे परिसरातील इतर नियमित मार्गांवरही जादा बसगाड्या उपलब्ध करून देण्यात येणार आहेत. प्रवाशांना मार्गदर्शन व सहकार्य करण्यासाठी बस निरीक्षक आणि वाहतूक अधिकाऱ्यांची नियुक्ती देखील संपूर्ण कालावधीत करण्यात आली आहे, अशी माहिती बेस्ट उपक्रमाकडून देण्यात आली आहे.