शहापूर, मुरबाडमध्ये गुन्हे शाखेची छापेमारी
जुगारप्रकरणी २७ जण ताब्यात
शहापूर, ता. १३ (वार्ताहर) : जिल्ह्यातील शहापूर, मुरबाड आणि भिवंडी तालुक्यांमध्ये स्थानिक गुन्हे शाखेने सलग तीन दिवस छापे टाकून २७ जणांना जुगारप्रकरणी ताब्यात घेतले आहे. या कारवाईत सुमारे पावणेदोन लाखांची रोकड व जुगार साहित्य जप्त करण्यात आले आहे. संबंधितांवर मुरबाड, वासिंद व पडघा पोलिस ठाण्यांत गुन्हे दाखल करण्यात आले आहेत. पोलिस अधीक्षक डॉ. डी. एस. स्वामी यांच्या आदेशानुसार, वरिष्ठ पोलिस निरीक्षक सुरेश मनोरे यांच्या मार्गदर्शनाखाली विशेष पथकांनी ही कारवाई केली.
मुरबाडमधील सरळगाव येथील फार्महाउसवर छापा टाकून ११ जणांना ताब्यात घेतले. यात ७२ हजार १०० रुपयांची रोकड जप्त केली. रायकरपाडा (वासिंद, शहापूर) येथून नऊ जणांना अटक केली. तर ७७ हजार १०० रुपयांची रोकड जप्त केली. भिवंडीतील चौधरीपाडा येथून सात जणांना ताब्यात घेतले. ३८ हजार ७०० रुपये रोकड हस्तगत केली. पोलिसांनी सांगितले, की अशा बेकायदा जुगार अड्ड्यांवर नियमित कारवाई केली जाणार असून ग्रामीण भागातही कठोर पावले उचलली जातील.