तीन पत्ती खेळणारे २५ जण पोलिसांच्या ताब्यात
ठाणे, ता.१३ : ठाणे ग्रामीणमधील मुरबाड, वाशिंद आणि पडघा या तीन पोलिस ठाण्याच्या हद्दीत अवैधरित्या जुगार खेळणाऱ्या २५ जणांना पोलिसांनी ताब्यात घेतले. तसेच त्या ठिकाणी केलेल्या कारवाईत एक लाख ८७ हजार ९०० रुपयांची रोकड आणि साहित्य जप्त करण्यात आले आहे. ही कारवाई ठाणे ग्रामीण स्थानिक गुन्हे शाखेने केली आहे.
ठाणे ग्रामीण पोलिस दलाच्या कार्यक्षेत्रात अवैध धंद्याविरुध्द प्रभारी कारवाई कारण्याबाबतचे ठाणे ग्रामीण पोलीस अधीक्षक डॉ. डी. एस. स्वामी यांच्या आदेश देण्यात आले होते. त्यानुसार स्थानिक गुन्हे शाखेचे वरीष्ठ पोलीस निरीक्षक सुरेश मनोरे यांनी जिल्हयात अवैध धंद्याबाबत गोपनीय माहिती घेत, वेगवेगळे पथक तयार करुन त्यांच्याद्वारे कारवाई केली. मुरबाड पोलीस ठाण्याच्या हदीतील बदाणे गावाजवळील सरळगाव-किन्हवली रोड लगत असलेल्या एका फार्म हाऊस येथे टाकलेल्या छाप्यात जुगार खेळणाऱ्या ११ जणांना ताब्यात घेत त्यांच्याकडुन ७२ हजार १०० रुपयांची रोख रक्कम व तीन पत्ते खेळण्याचे साहित्य जप्त करण्यात आले. तर १० सप्टेंबर २०२५ रोजी वाशिंद पोलिस ठाण्याच्या हद्दीतील रायकर पाडा, जिजामाता नगर येथील छाप्यात जुगार खेळणाऱ्या ०९ जणांना ताब्यात घेत, त्यांच्याकडून ७७ हजार १०० रुपयांची रोख रक्कम व तीन पत्ते खेळण्याचे साहित्य जप्त केले. तसेच रविवार (ता.१२) पडघा पोलिस ठाण्याच्या हद्दीतील चौधरी पाडा येथील छाप्यात जुगार खेळणाऱ्या ०७ जणांना ताब्यात घेत त्यांच्याकडुन ३८ हजार ७०० रुपयांची रोख रक्कम व तीन पत्ते खेळण्याचे साहित्य जप्त केले आहे. अशाप्रकारे ०३ ठिकाणी अवैध जुगाराचे कारवाई करुन २५ जणांविरोधात त्या- त्या पोलिस ठाण्यात महाराष्ट्र जुगार कायदा कलम १२ अ प्रमाणे गुन्हे दाखल केल्याची माहिती पोलिसांनी दिली.