पूरग्रस्तांना मदत करण्याची मोहन कोनकर यांची मागणी
कल्याण, ता. १४ (वार्ताहर) : मागील महिन्यात झालेल्या अतिवृष्टीमुळे शहाड परिसरातील नागरिकांचे मोठ्या प्रमाणात नुकसान झाले होते, मात्र हे नागरिक अद्यापही शासनाच्या मदतीपासून वंचित असून, या पूरग्रस्तांना मदत करण्याची मागणी भारतीय जनता पक्षाचे शहाडचे वॉर्ड अध्यक्ष मोहन कोनकर यांनी कल्याणच्या तहसीलदारांकडे पत्राद्वारे केली आहे.
ऑगस्ट महिन्यातील पावसामुळे आलेल्या पुरात शहाड वॉर्ड क्रमांक १५ येथील बंदरपाडा, भालचंद्र नगर, खिमळी चाळ, अंबिका नगर, अवनी कॉम्पलेक्स, शहाड रोड जवळील दुकाने या सर्वांच्या घरात पुराचे पाणी शिरले होते. त्यामुळे नागरिकांचे खूप नुकसान झाले आहे. या सर्वांना मदत म्हणून नुकसानभरपाई देण्याची मागणी मोहन कोनकर यांनी कल्याणच्या तहसीलदारांकडे पत्राद्वारे केली आहे.