नेरूळ सेक्टर-२३ स्मशानभूमीत गर्दुल्यांचा वावर
माजी नगरसेवक काशिनाथ पाटील यांचे पालिकेला निवेदन
तुर्भे, ता. १४ (बातमीदार) ः नेरूळ विभागातील जुईपाडा गाव, सेक्टर-२३ येथील महापालिकेच्या स्मशानभूमीत असुरक्षित वातावरण निर्माण झाले असून, येथे पूर्णवेळ सुरक्षा रक्षकांची नियुक्ती करण्याची मागणी स्थानिक नागरिकांसह माजी नगरसेवक काशिनाथ पाटील यांनी केली आहे. स्मशानभूमीत मद्यपी आणि चरसींचा वावर वाढल्यामुळे परिसरातील नागरिक त्रस्त झाले आहेत. भविष्यात येथे कोणतीही दुर्घटना घडल्यास त्याची जबाबदारी महापालिका प्रशासनावर राहील, असा स्पष्ट इशारा दिला गेला आहे.
स्मशानभूमी परिसरात दिवस-रात्र मद्यपान आणि हाणामारीच्या घटना घडत आहेत. अनोळखी लोकांचा वावर वाढल्याने चोरी आणि लूटमारीची शक्यता नाकारता येत नाही. त्यामुळे केवळ परिसरातील शांतता भंग होत नाही, तर मृतांच्या अंत्यसंस्कारासाठी येणाऱ्या कुटुंबीयांनाही प्रचंड गैरसोयींचा सामना करावा लागत आहे. काशिनाथ पाटील यांनी महापालिका आयुक्तांना दिलेल्या निवेदनात, तीन पाळ्यांत किमान तीन सुरक्षा रक्षक नेमण्याची मागणी केली आहे. त्यांच्या मते, यामुळे स्मशानभूमीतील उपद्रव, गर्दुल्ल्यांचा त्रास आणि गैरप्रकार रोखता येतील. त्याचबरोबर स्मशानभूमीचे पावित्र्य आणि परिसराची स्वच्छता टिकून राहील. या मागणीला आमदार मंदा म्हात्रे यांचेही पाठबळ मिळाले आहे. त्यांनी महापालिका आयुक्त आणि परिमंडळ-एकचे उपआयुक्त सोमनाथ पोटरे यांना दिलेल्या निवेदनात स्पष्ट नमूद केले की, स्मशानभूमीतील समस्यांचे गांभीर्य लक्षात घेऊन त्वरित उपाययोजना न झाल्यास आणि भविष्यात कोणतीही दुर्घटना घडल्यास त्याची संपूर्ण जबाबदारी महापालिका प्रशासनावर असेल.
....................
कायदा व सुव्यवस्थेला मदत
स्मशानभूमी परिसरात सुरक्षा रक्षक नेमल्यास केवळ नागरिकांच्या सुरक्षिततेत भर पडणार नाही, तर परिसरातील कायदा व सुव्यवस्था सुधारण्यासही हातभार लागेल. स्थानिक ग्रामस्थांनीही प्रशासनाने याबाबत लवकर निर्णय घेऊन कारवाई करावी, अशी अपेक्षा व्यक्त केली आहे.