विरार-दादर लोकलमध्ये मनोरुग्णाचे अश्लील चाळे करीत स्टंटबाजी

नालासोपारा, ता. १४ (बातमीदार) : पश्चिम रेल्वेच्या विरार-दादर लोकलमध्ये एका मनोरुग्ण तरुणाने लोकलमध्ये स्टंटबाजी करीत महिला डब्याकडे पाहात अश्लील वर्तन केल्याचा एक धक्कादायक व्हिडिओ समाजमाध्यामांवर व्हायरल होत आहे. ही घटना गुरुवारी (ता. ११) सायंकाळी सहा वाजता बोरिवली ते वांद्रा स्थानकादरम्यान घडल्याची माहिती वसई लोहमार्ग पोलिसांनी दिली.

लोकलच्या महिला डब्यामागील माल डब्यात हा मनोरुग्ण तरुण दरवाजात उभा राहून महिलांच्या डब्यात पाहात अश्लील शेरेबाजी करीत होता. या वेळी एका महिलेने या तरुणाचा हा व्हिडिओ काढला. सायंकाळच्या वेळेस चर्चगेटच्या दिशेने जाणाऱ्या लोकलमध्ये तुरळक गर्दी असते. मिरा रोड स्थानक गेल्यानंतर महिला डब्याशेजारी असलेल्या माल डब्यात माथेफिरू तरुण चढला होता. तरुणाने महिलांच्या डब्यात डोकावून अश्लील शेरेबाजी करायला सुरुवात केली. धावत्या लोकलमध्ये खिडकीतून महिलांना पाहून हा माथेफिरू अश्लील हावभाव करीत होता. त्यानंतर या तरुणाने रागारागाने लोकलच्या डब्याच्या पत्र्यावर जोरजोराने बुक्के मारायल्याचे या व्हिडिओत दिसत आहे. या घटनेचा व्हिडिओ व्हायरल होत असून, वसई लोहमार्ग पोलिस या प्रकरणाचा अधिक तपास करीत आहेत.