उल्हासनगर, ता. १४ (बातमीदार) : लोकअदालतच्या माध्यमातून आयुक्त मनीषा आव्हाळे यांच्या मार्गदर्शनाखाली उल्हासनगर महापालिकेने शनिवारी (ता. १३) एकदिवसीय अभय योजना राबवली. या योजनेत मालमत्ता कराची थकबाकी एकरकमी भरल्यास त्यावरील १०० टक्के व्याज माफ करण्यात येईल, असे जाहीर केले होते. नागरिकांनी या योजनेला उत्तम प्रतिसाद दिला. एका दिवसात तब्बल पाच कोटी १९ लाख रुपयांची वसुली झाली.
मागील वर्षीही अशीच योजना राबवली होती. त्यावेळी साडेतीन कोटींची वसुली झाली होती. मात्र, यंदा आयुक्त मनीषा आव्हाळे, अतिरिक्त आयुक्त किशोर गवस, धीरज चव्हाण, उपायुक्त विशाखा मोटघरे यांच्या मार्गदर्शनाखाली कर निर्धारक व संकलक तथा सहायक आयुक्त मयुरी कदम आणि नितेश रंगारी यांनी त्यांच्या टीमसोबत प्रभावी कामगिरी करत विक्रमी वसुली केली. या आर्थिक वर्षात आतापर्यंत मालमत्ता कर विभागाने ५१ कोटी ९५ लाख रुपयांची वसुली केली आहे. यापूर्वीची सर्वाधिक वसूली १२६ कोटी रुपयांची होती. मार्च २०२६ पर्यंत हा विक्रम मोडला जाईल की नाही, याकडे सर्वांचे लक्ष लागले आहे.