अंबरनाथमध्ये अल्पवयीन मुलगा ड्रग्जच्या विळख्यात

अंबरनाथ, ता. १५ (वार्ताहर) : शहरातील अल्पवयीन मुलांमध्ये गांजा, सुली आणि इतर ड्रग्जचे व्यसन वाढत असून, यामुळे अंबरनाथकर संताप व्यक्त करत आहेत. त्यातच आता अंबरनाथ पश्चिम स्थानक चौक पोलिस ठाण्यासमोरचा एक धक्कादायक व्हिडिओ सोशल मीडियावर व्हायरल झाला आहे. या व्हिडिओमध्ये आठ वर्षांचा एक मुलगा आपल्या अल्पवयीन मित्राला धरून ड्रग्ज मागताना दिसत आहे. त्यानंतर त्याने स्वतःच्या खिशातून नशेची बाटली काढल्याचेही स्पष्ट दिसते. स्थानक परिसरातील सिद्धार्थ नगर भागात काही महिला आपल्या घरातूनच ड्रग्जचा व्यवसाय करत असल्याची माहिती समोर आली आहे. आतापर्यंत पाच महिलांविरोधात गुन्हा दाखल झाला असून, रविवारी (ता. १४) पोलिसांनी या परिसरातून दोन तरुणांना गांजा सेवन करताना रंगेहाथ पकडले आहे. अंबरनाथमध्ये अल्पवयीन मुले नशेच्या गर्तेत ओढली जात असल्याची वस्तुस्थिती समोर येताच नागरिकांकडून याविरोधात कठोर कारवाईची मागणी केली जात आहे.