इंजिनिअरिंग, पॉलिटेक्निक प्रवेशांची मुदत संपली
यंदा पॉलिटेक्निकला रेकॉर्ड ब्रेक प्रवेश
इंजिनिअरिंगच्या ३६ हजार १६८ जागा रिक्त
मुंबई, ता. १५ : राज्य सीईटी सेलकडून राज्यातील पदवीच्या इंजिनिअरिंग (अभियांत्रिकी), एमबीए या अभ्यासक्रमांची प्रवेश प्रक्रिया पूर्ण करण्यात आली. यात इंजिनिअरिंगच्या बीई, बीटेकच्या दोन लाख दोन हजार ६८३ जागांपैकी एक लाख ६६ हजार ७४० जागांवर प्रवेश झाले, तर यंदाही ३६ हजार १६८ जागा रिक्त राहिल्या. दुसरीकडे तंत्रशिक्षण संचालनालयाअंतर्गत येणाऱ्या आणि दहावीनंतरच्या पदविका पॉलिटेक्निक (अभियांत्रिकी)साठी तब्बल एक लाख सात हजार ९०६ विद्यार्थ्यांनी प्रवेश घेतले. यंदाच्या शैक्षणिक वर्षात पॉलिटेक्निकच्या (अभियांत्रिकी पदविका) शाखेतील प्रवेशाने मागील काही वर्षांतील प्रवेशाचा विक्रमच मोडीत काढला आहे. एमबीएला मात्र मागील वर्षाप्रमाणेच ३२ हजारांहून अधिक प्रवेश झाले असून, असंख्य जागा यंदाही रिक्त राहिल्या आहेत.
अखिल भारतीय तंत्रशिक्षण परिषदेने अभियांत्रिकी, पॉलिटेक्निक, एमबीए अशा अभ्यासक्रमांच्या प्रवेशासाठी १५ सप्टेंबरपर्यंत मुदत दिली होती. त्या मुदतीत पदवीच्या अभियांत्रिकीसोबत पदविकेच्या पॉलिटेक्निकचे प्रवेशही आज पूर्ण करण्यात आले असून, लवकरच राज्यात या सर्व अभ्यासक्रमाचे नियमित वर्ग संबंधित महाविद्यालयांमध्ये सुरू होतील, अशी माहिती तंत्रशिक्षण संचालक डॉ. विनोद मोहीतकर यांनी दिली.
यंदाच्या शैक्षणिक वर्षात पदवीच्या अभियांत्रिकी प्रवेशासाठी अभियांत्रिकी अभ्यासक्रमात १५ हजार जागांची वाढ झाली असून, एकूण ३६७ महाविद्यालयांमध्ये एक लाख ७५ हजार ५८५ जागा उपलब्ध आहेत. या जागांवर तब्बल दोन लाख १३ हजार अर्ज प्राप्त झाले होते. त्यापैकी एक लाख ६६ हजार ७४० जागांवर प्रवेश झाले आहेत.