सेवा पंधरावडांतर्गत विविध उपक्रमांचे आयोजन
पनवेल, ता. १६ (बातमीदार) : पंतप्रधान नरेंद्र मोदी यांच्या वाढदिवसानिमित्त १७ सप्टेंबर ते २ ऑक्टोबर या कालावधीमध्ये छत्रपती शिवाजी महाराज महाराजस्व अभियानाअंतर्गत सेवा पंधरवडा रावण्याचा निर्णय सरकारने घेतला आहे. त्या अनुषंगाने तालुक्यातही विविध विभागांच्या माध्यमातून नागरिकाभिमुख उपक्रम राबविण्यात येणार असून, नागरिकांनी यात मोठ्या संख्येने सहभागी व्हावे, असे आवाहन अप्पर तहसीलदार पनवेल कार्यालयाकडून करण्यात आले आहे.
या उपक्रमाची यशस्वी अंमलबजावणीसाठी नोडल अधिकारी म्हणून अप्पर तहसीलदार कार्यालयातील संबंधित मंडळ अधिकारी व ग्राममहसूल अधिकारी यांची नेमणूक करण्यात आली आहे. संबंधित अधिकारी गावपातळीवर जाऊन ग्रामपंचायत पदाधिकारी, सरपंच व स्थानिक नागरिकांशी संवाद साधतील. गावांमध्ये स्वच्छता मोहिमा, वृक्षारोपण, तंबाखूमुक्त ग्राम संकल्प, जनजागृती सभा, तसेच शासकीय योजनांची माहिती व लाभ वितरण करण्यात येणार आहे. नागरिकांनी स्वच्छता मोहिमा, आरोग्य शिबिरे आणि शासकीय योजना लाभ वितरण या सर्व उपक्रमांत सक्रिय सहभाग नोंदवून सेवा पखवाडा यशस्वी करावा, असे आवाहन निवासी नायब तहसीलदार संभाजी शेलार यांनी केले आहे