आरोग्य केंद्रात रुग्णांच्या जीवाशी खेळ

टिटवाळा, ता. १७ (वार्ताहर) : कचऱ्याच्या ढिगाऱ्यांमुळे, सांडपाणी आणि दूषित पाण्यामुळे तालुक्यात डासांचे प्रमाण मोठ्या प्रमाणात वाढले आहे. त्यामुळे मलेरिया, डेंगी, टायफॉईड, सर्दी-ताप, खोकला, तसेच श्वानदंश, विंचूदंश आणि सर्पदंश यांसारख्या आजारांचे रुग्ण दिवसेंदिवस वाढत आहेत. अशा गंभीर परिस्थितीत प्राथमिक आरोग्य केंद्रे आणि उपकेंद्रे रामभरोसे सोडण्यात आल्याचा आरोप समाजसेवक महेश देशमुख यांनी केला आहे.

देशमुख यांनी सांगितले, की निळजे, खडवली आणि दहागाव येथील प्राथमिक आरोग्य केंद्रांसह १६ उपकेंद्रे काही काळासाठी बंद पडली होती. तालुका आरोग्य अधिकाऱ्यांनी दुपारी दोन ते पाच वाजेपर्यंत कामाचा आढावा घेण्यासाठी सर्व वैद्यकीय अधिकारी, आरोग्य सहाय्यक, लॅब टेक्निशियन आणि अन्य कर्मचाऱ्यांना बैठक बोलावली होती. त्यामुळे आरोग्य केंद्रे मनुष्यबळाविना राहिली. एखादा रुग्ण इमर्जन्सीमध्ये आला असता तर त्याचे जीव धोक्यात येऊ शकत होते, अशी चिंता देशमुख यांनी व्यक्त केली. त्यांनी मुख्य कार्यकारी अधिकारी रोहन घुगे आणि गटविकास अधिकारी, पंचायत समिती कल्याण यांच्याकडे औपचारिक तक्रार दाखल करण्याची घोषणा केली आहे.

दहागाव केंद्राच्या हद्दीत येणाऱ्या म्हारळ, वरप, कांबा, रायते, गोवेली, खोणी यांसारख्या गावांमध्ये रुग्णसंख्या मोठी असून, डिलिव्हरी, किशोरवयीन मुलींचे आरोग्य, कुपोषित बालके, तसेच सर्पदंश आणि दंशग्रस्त रुग्णांचे प्रकरण वारंवार येते. या वेळी वैद्यकीय कर्मचाऱ्यांची अनुपस्थिती गंभीर समस्या आहे. याबाबत जिल्हा आरोग्य अधिकारी डॉ. गंगाधर परगे यांनी सांगितले, हा प्रकार चुकीचा आहे. पुढे असे होणार नाही, यासाठी कल्याण तालुका आरोग्य अधिकाऱ्यांना सक्त सूचना दिल्या जातील.