मुंबई-गोवा महामार्गावरील भुवन रस्त्याची चाळण
खड्ड्यांमुळे प्रवासी हैराण; प्रशासनाचे दुर्लक्ष
रोहा, ता. १७ (बातमीदार) ः मुंबई-गोवा महामार्गावरील भुवन गाव हद्दीतील रस्त्याची अवस्था अत्यंत दयनीय झाली आहे. या रस्त्यावर मोठ्या प्रमाणात खड्डे पडले असून, यातून मार्ग काढताना वाहनचालकांना तारेवरची कसरत करावी लागत आहे. यामुळे प्रवासी आणि येथील रहिवासी हैराण झाले आहेत.
मुंबई-गोवा राष्ट्रीय महामार्गावरून कोलाड बाजूकडून इंदापूर-माणगावकडे जाणाऱ्या भुवन येथील नाल्यावरील पुलावर अनेक खड्डे पडले आहेत. या पुलावरून प्रवास करणे धोकादायक झाले असून, पुलाच्या दोन्ही बाजूला असणारे संरक्षण कठडेही काही महिन्यापूर्वी कोसळले होते. ते नवीन बांधण्यात आले आहेत, परंतु जुना पूल मात्र अद्याप तसाच आहे. या ठिकाणी नवीन पूल बांधण्याची गरज नागरिकांनी व्यक्त केली आहे.
मुंबई-गोवा महामार्गाच्या चौपदरीकरणाचे काम गेली १७ ते १८ वर्षांपासून सुरू आहे. काही ठिकाणी काम पूर्ण झाले, मात्र अद्यापही काही ठिकाणी काम अपूर्णावस्थेत आहे. या मार्गावरील आंबेवाडी (कोलाड), तिसे, तळवली, भुवन येथील रस्त्याला खड्डे पडले असून, यामुळे अपघाताचा धोका वाढला आहे. संबंधितांनी याकडे लक्ष देऊन काम मार्गी लावावे, अशी मागणी येथील नागरिकांतून होत आहे.

फोटो कॅप्शन : मुंबई-गोवा महामार्गावरील भुवन येथील रस्त्याची चाळण झाल्याचे चित्र दिसत आहे ...