सामाजिक बांधिलकी जपून नवरात्रोत्सव साजरा करा!
दादर पोलिस ठाण्याच्या बैठकीत आवाहन
प्रभादेवी, ता. १८ (बातमीदार) : आगामी येणाऱ्या नवरात्रोत्सवाला कुठेही गालबोट न लागता सामाजिक बांधिलकी जपून आनंदाने हा उत्सव साजरा करण्याचे आवाहन दादर पोलिस ठाण्याच्या वतीने करण्यात आले. परिसरातील मंडळाची बैठक आयोजित करण्यात आली होती, या वेळी पदाधिकारी यांना मार्गदर्शन करण्यात आले.
गणेशाेत्‍सवानंतर नवरात्रोत्‍सव निर्विघ्‍नपणे साजरा व्हावा, यासाठी दादर पोलिस ठाण्याच्या वतीने ही बैठक आयोजित केली होती. या वेळी दादर, प्रभादेवी परिसरातील ७० हून अधिक मंडळांच्या पदाधिकाऱ्यांनी उपस्थिती दर्शविली.
नवरात्रोत्सव काळात उत्सव शांततेत कसा साजरा करावा, मंडळातील पदाधिकारी सदस्य यांनी घ्यावयाची जबाबदारी, नियम याबाबत दादर पोलिस ठाण्याचे वरिष्ठ पोलिस निरीक्षक ज्ञानेश्वर आवारी यांनी उपस्थितांना मार्गदर्शन केले.
सर्व नवरात्रोत्‍सव आयोजक मंडळांनी परवानगीसाठी तत्काळ पोलिस ठाण्यांमध्ये अर्ज सादर करावे, महापालिका व पोलिसांनी दिलेल्या नियमाचे पालन करावे, सीसीटीव्ही कॅमेरे, अग्‍निरोधक यंत्रणा सज्‍ज ठेवावी, गरबा कार्यक्रमाच्या ठिकाणी स्वयंसेवक नेमून सर्वांना ओळखपत्र द्यावे, कुठलेही धार्मिक वाद होणार नाही याबाबत खबरदारी घ्यावी, आक्षेपार्ह देखावे, बॅनर, पोस्टर लावू नये अशा प्रकारच्या सूचना देण्यात आल्या. नवरात्रोत्‍सवामध्ये उद्भवणाऱ्या समस्या, पार्किंगची व्यवस्‍था याबाबतच्या सूचना मंडळातील पदाधिकाऱ्यांनी मांडल्या.
या वेळी वरिष्ठ पोलिस निरीक्षक ज्ञानेश्वर आवारी, पोलिस निरीक्षक विशाल खैरे, पोलिस हवालदार राहुल अनभूले, संदीप कुसळे, बिट अंमलदार उपस्थित होते.