शासकीय रुग्णालयाच्या शौचालयात रुग्णाचा मृत्यू
प्रशासनाच्या निष्काळजीपणावर गंभीर आरोप
उल्हासनगर, ता. १८ (वार्ताहर) : उल्हासनगरच्या शासकीय मध्यवर्ती रुग्णालयात उपचार सुरू असताना महेश कुकरेजा (वय ४५) या रुग्णाचा रुग्णालयाच्या शौचालयातच मृत्यू झाल्याची घटना समोर आली आहे. या घटनेनंतर रुग्णालयाची प्रशासकीय बेफिकिरी आणि कर्मचाऱ्यांच्या निष्काळजीपणावर गंभीर आरोप करण्यात आले आहेत. या प्रकरणाची सखोल चौकशी करून दोषींवर कठोर कारवाई करावी, अशी मागणी समाजसेविका डॉ. रुपिंदर कौर मुरजानी यांनी आरोग्यमंत्र्यांकडे केली आहे.
महेश कुकरेजा यांना उपचारासाठी शनिवारी (ता. १३) रुग्णालयात दाखल करण्यात आले होते. सुरुवातीला ड्युटीवर असलेल्या डॉक्टरांनी त्यांना दाखल करून घेण्यास नकार दिला. त्यानंतर डॉ. मुरजानी यांनी रुग्णालयाचे अधीक्षक डॉ. मनोहर बनसोडे यांच्याशी संपर्क साधल्यावर महेश कुकरेजा यांना रुग्णालयात दाखल करून घेण्यात आले.
नातेवाईक मोनिका कुकरेजा यांनी दिलेल्या माहितीनुसार, महेश कुकरेजा यांची मंगळवारी (ता. १६) तब्येत अचानक बिघडली. ते शौचालयात बेशुद्धावस्थेत आणि रक्ताने माखलेले आढळले. या वेळी त्यांना मदत करण्यासाठी कोणताही कर्मचारी किंवा डॉक्टर उपस्थित नव्हता. दरम्‍यान, मदत करण्याऐवजी एका कर्मचाऱ्याने रुग्णाला दुसऱ्या रुग्णालयात नेण्याचा सल्ला दिला. याच निष्काळजीपणामुळे रुग्णाचा शौचालयातच मृत्यू झाला, असा आरोप नातेवाइकांनी केला आहे.

प्रमुख त्रुटी आणि आरोप
रुग्णालयातील डॉक्टरांचा निष्काळजीपणा, अपूर्ण आपत्कालीन व्यवस्था, अस्वच्छता, विलंबित रक्त तपासणी, वाईट पायाभूत सुविधा यांवर बोट ठेवत डॉ. मुरजानी यांनी म्हटले, की ही घटना केवळ एक अपवाद नसून, रुग्णालयाच्या व्यवस्थेचे अपयश दर्शविते. दोषींवर त्वरित कारवाई करून रुग्णालयाची व्यवस्था सुधारावी, अशी मागणी त्यांनी केली आहे.

-----------
ही घटना अत्यंत धक्कादायक व संतापजनक आहे. एका रुग्णाचा जीव वाचवता आला असता, मात्र निष्काळजीपणा, जबाबदारीचा अभाव आणि टाळाटाळीच्या वृत्तीमुळे त्याचा शौचालयातच मृत्यू झाला. मी आरोग्यमंत्र्यांकडे चौकशी, दोषींवर कठोर कारवाई व रुग्णालयातील सुविधा तातडीने सुधारा अन्यथा अशा निष्काळजीपणामुळे अजून कित्येक रुग्णांचे जीव धोक्यात जातील.
-डॉ. रुपिंदर कौर मुरजानी (तक्रारदार)
---------------------------------------------------------------
हा रुग्ण बाथरूममध्ये गेल्यानंतर अचानक खाली पडला. आमच्या कर्मचाऱ्यांनी तत्काळ त्याला बाहेर काढून बेडवर आणले. मदत करण्याचा प्रयत्न केला, पण दुर्दैवाने उपचारापूर्वीच त्याचा मृत्यू झाला होता. या घटनेची सखोल चौकशी करून भविष्यात अशा घटना टाळण्यासाठी पावले उचलली जातील.
- डॉ. मनोहर बनसोडे, जिल्हा शल्यचिकित्सक