राज ठाकरे आज कल्याणमध्ये
सांगळे-दुबे वादावर काय बोलणार?
कल्याण, दि. १८ (बातमीदार) : मनसे अध्यक्ष राज ठाकरे हे शुक्रवारी (ता. १९) कल्याण दौऱ्यावर असून, सकाळी ११ वाजता ते कल्याण पश्चिमेत पदाधिकाऱ्यांशी संवाद साधणार आहेत. महापालिका निवडणुकांना काही महिने उरले असून, त्यासंदर्भातही ते पदाधिकाऱ्यांना मार्गदर्शन करणार आहेत. मागील काही काळात कल्याण शहरात मराठी-अमराठी वादाच्या अनेक घटना घडल्या असून, त्याचाही मागोवा ते घेण्याची दाट शक्यता आहे. त्याचबरोबर पूर्वेतील सांगळे-दुबे कुटुंबीयांच्या वादावरही ते भाष्य करणार असल्याची माहिती आहे.
मनसेचे ठाणे जिल्हाध्यक्ष अविनाश जाधव यांनी नुकतीच सांगळे कुटुंबीयांची भेट घेऊन त्यांना पाठींबा दर्शविला होता. आता राज ठाकरे कल्याणमध्ये आल्यावर सांगळे कुटुंबीयांची भेट घेऊ शकतात. त्यामुळे या प्रकरणाला अधिक बळकटी मिळणार आहे. मागील तीन वर्षांपासून सांगळे-दुबे कुटुंबांत दुकानाच्या मालकी हक्कावरून वाद सुरू होते; मात्र आता मनसेच्या मध्यस्थीने मराठी-अमराठी वळण मिळाल्याने दुबेंसमोर आता केवळ सांगळे नसून राज ठाकरेंच्या मनसेचे आवाहन आहे.