रस्ते अपघातात बाप-लेकीचा मृत्यू
भिवंडी, ता. १८ (वार्ताहर) : मुंबई-नाशिक महामार्गावरील भिवंडी-ठाणे बायपास रस्त्यावर झालेल्या एका भीषण अपघातात वडील आणि सहा वर्षांच्या मुलीचा दुर्दैवी मृत्यू झाला असून, पत्नी गंभीर जखमी आहे.
पडघा येथील बोरिवली गावातील रहिवासी असलेले सईम मकबूल खोत (वय ४८), त्यांची पत्नी सुबी खोत आणि मुलगी मरियम खोत (वय ६) हे दुचाकीवरून दुपारी मरियम हिला दवाखान्यात तपासणीसाठी भिवंडीला घेऊन जात असताना हा अपघात घडला. कुकसे गावाजवळ त्यांच्या दुचाकीला भरधाव वेगाने येणाऱ्या ट्रकने धडक दिली.
या धडकेत दुचाकी ट्रकच्या चाकाखाली आल्याने सईम खोत आणि मुलगी मरियम यांचा जागीच मृत्यू झाला. पत्नी सुबी खोत गंभीर जखमी असून, त्यांना पुढील उपचारांसाठी ठाण्यातील ज्युपिटर रुग्णालयात दाखल करण्यात आले आहे. या घटनेनंतर बोरिवली गावावर शोककळा पसरली आहे. याप्रकरणी पडघा पोलिस ठाण्यात गुन्हा दाखल करण्याची प्रक्रिया सुरू आहे.