वाहने चोरणारा सराईत चोरटा जेरबंद
सकाळ वृत्तसेवा
ठाणे, ता. १८ : ‘मास्टर की’च्या मदतीने एका महिन्यात रस्त्याच्या कडेला उभ्या केलेल्या पाच दुचाकी आणि दोन रिक्षा अशी सात वाहने लांबवणाऱ्या कळव्यातील करण बाळू आढाव (२४) या सराईत चोरट्याला ठाणे गुन्हे शाखेच्या पथकाने मोठ्या शिताफीने जेरबंद केले. त्याच्याकडून तीन लाखांची वाहने जप्त केली असून, ठाणे शहर पोलिस दलातील सहा आणि ग्रामीण पोलिस दलातील एक असे सात गुन्हे उघडकीस आणण्यात यश आले. अटकेतील चोरट्यावर यापूर्वी पाच कापूरबावडी आणि एक कळवा पोलिस ठाण्यात गुन्हा दाखल असल्याची माहिती पोलिसांनी दिली. खारेगाव परिसरातून रस्त्याच्या कडेला पार्क केलेली रिक्षा १२ सप्टेंबर २०२५ रोजी चोरी गेली होती. याप्रकरणी कळवा पोलिस ठाण्यात गुन्हा दाखल झाल्यानंतर या गुन्ह्यासंदर्भात वरिष्ठांनी तो गुन्हा उघडकीस आणण्याबाबत ठाणे गुन्हे शाखेला सूचना दिल्या होत्या. त्यानुसार वरिष्ठ पोलिस निरीक्षक सचिन गायकवाड यांच्या मार्गदर्शनाखाली दाखल गुन्ह्याचा समांतर तपास करताना, तपासामध्ये घटनाथळी मिळालेल्या सीसीटीव्ही फुटेजमध्ये रिक्षाचोरी करून घेऊन गेल्याचे गुन्हे शाखेचे सहाय्यक पोलिस उपनिरीक्षक दयांनद नाईक व पोलिस हवालदार संदीप महाडीक यांनी निष्पन्न केले. चोरटा हा ज्या दिशेने रिक्षा घेऊन गेला, त्या माजिवाडा, घोडबंदर रोडवरील सीसीटीव्ही पडताळून त्याचा ठावठिकाणा निष्पन्न करून करण आढाव याला अटक केली. त्या गुन्ह्याच्या व्यतिरिक्त ठाणे पोलिस आयुक्तालयात आणखी सहा वाहनचोरीचे गुन्हे केल्याचे निष्पन्न झाले, तर चोरटा हा मास्टर कीने रोडच्या कडेला पार्क केलेल्या ऑटो रिक्षा तसेच दुचाकी चालू करून त्या चोरी करत असल्याचे तपासात उघडकीस आले आहे. त्याच्याविरुद्ध ठाणे पोलिस आयुक्तालयातील कळवा, नौपाडा, कापूरबावडी, खडकपाडा आणि ग्रामीण पोलिस दलातील गणेशपुरी पोलिस ठाण्यात सात गुन्हे दाखल असून, त्या गुन्ह्यातील जप्त केलेल्या वाहनांची किंमत दोन लाख ८५ हजार रुपये इतकी आहे, अशी माहिती पोलिसांनी दिली.