प्रवासी भरण्यावरून रिक्षावाले एकमेकांशी भिडले
ठाणे,ता.२०: रिक्षा थांब्यावरून प्रवासी भरण्यावरून दोन रिक्षाचालक एकमेकांशी भिडले. याचदरम्यान एका रिक्षाचालकाने मित्राच्या मदतीने दुसऱ्या रिक्षाचालकाला प्लास्टिक वायर आणि लोखंडी स्टूलाने मारहाण केल्याची घटना समोर आली आहे. या घटनेत जखमी झालेल्या रिक्षाचालकाने त्या दोघांविरोधात पोलिस ठाण्यात धाव घेत, मारहाणीचा गुन्हा दाखल केला आहे. महात्मा फुले नगर येथे राहणारे पवन जाधव (३०) असे जखमी रिक्षाचालकाचे नाव असून त्यांचे आणि लोकमान्य नगर येथे राहणारे रिक्षाचालक रोशन निकम या दोघांमध्ये १२ सप्टेंबर रोजी यशोधननगर नाका येथे रिक्षामध्ये प्रवासी भरण्यावरून वाद झाला. त्यानंतर रोशन याने शनिवार (ता.१३) सप्टेंबर जखमी रिक्षाचालक जाधव यांना "तु जर यशोधन नगरात रिक्षामध्ये प्रवासी भरले तर तुला बघून घेईल अशी फोनद्वारे धमकी दिली. त्यामुळे जाधव यांनी रविवार (ता.१४) सप्टेंबर वर्तकनगर पोलिस ठाण्यात जाऊन रोशन याच्याविरोधात तक्रार दिली. सायंकाळी साडेपाच वाजताच्या सुमारास जाधव हे यशोधन नगर नाका येथे रिक्षा थांब्यावर रिक्षामध्ये प्रवासी भरत असताना, रोशन आणि त्याचा मित्र विशाल आंधळे तेथे आला. रोशन याने रिक्षामध्ये प्रवासी भरू नको, असे म्हणून तो वाद घालून शिवीगाळ केली. तसेच विशाल आंधळे याने हाताने मारहाण केली. त्यानंतर रोशन याने त्याच्या रिक्षातील प्लास्टिकचा वायर घेऊन मारहाण केली. तसेच बाजूला ठेवलेल्या लोखंडी स्टूलनेही जाधव मारहाण केल्याने त्यांना दुखापत झाली, त्यानंतर उपचारासाठी ठाणे जिल्हा शासकीय रुग्णालयात उपचार करून शुक्रवार (ता.१९) सप्टेंबर वर्तकनगर पोलिस ठाण्यात दिलेल्या तक्रारीनुसार त्या दोघांविरोधात गुन्हा दाखल करण्यात आला आहे. पुढील तपास वरिष्ठ पोलिस निरीक्षक राजकुमार वाकचौरे यांच्या मार्गदर्शनाखाली सुरू आहे
............