म्हाडाच्या घरांच्‍या किमती घटणार!
किंमत निश्चितीच्या समितीचा अहवाल प्राधिकरणाला सादर होणार

सकाळ वृत्तसेवा
मुंबई, ता. २० : म्हाडाकडून लाॅटरी जाहीर होताच नेहमी घरांच्या किमती जास्त असल्याची तक्रार सर्वसामान्यांकडून केली जाते, त्या पार्श्वभूमीवर म्हाडाच्या घरांच्या किमतीत ज्या अनावश्यक घटकांची भर पडते, त्याला कात्री लावण्यासाठी म्हाडाने समिती नेमली होती, त्या समितीचा अहवाल आठवडाभरात म्हाडा प्राधिकरणाला सादर केला जाणार आहे. या अहवालाच्या अनुषंगाने किमती निश्चित केल्यास म्हाडाच्या घरांच्या किमती आठ ते दहा टक्क्यांनी कमी होऊ शकणार आहेत.
सामान्यांना परवडणाऱ्या दरात घरे उपलब्ध व्हावीत, म्हणून म्हाडा सातत्याने प्रयत्नशील आहे; मात्र घरांच्या किमती निश्चित करताना रेडीरेकनरच्या दराशिवाय प्रशासकीय खर्च पाच टक्के, बांधकाम साहित्याच्या किमतीतील वाढ पाच टक्के, जमीन घेताना गुंतवलेल्या रकमेवरील व्याज, बांधकाम शुल्क या बाबी सरसकट विचारात घेतल्या जातात. त्यामुळे घरांच्या किमतीत या सर्व बाबींचा १० ते १५ टक्क्यांहून अधिकचा वाटा होत असल्याने एकूणच किमती वाढल्याचे दिसते. त्या पार्श्वभूमीवर घरांच्या किमती कशाप्रकारे कमी करता येतील, त्याबाबत अभ्यास करून अहवाल तयार करण्यासाठी म्हाडाने उपमुख्य कार्यकारी अधिकाऱ्यांच्यासह तीन जणांची समिती नेमली होती. या समितीच्या निष्कर्षानुसार रेडिरेकनर दराशिवाय ज्या घटकांचा खर्च होईल, त्याच किमतीचा अंतर्भाव केल्यास घरांच्या किमतीत दिलासादायक आठ-दहा टक्क्यांची कपात होऊ शकतो, अशी माहिती सूत्रांनी दिली. या समितीकडून आठवडाभरात आपला अहवाल सादर केला जाणार आहे. त्याचा थेट फायदा सर्वसामान्यांना होऊ शकेल.