पालघर, ता. २० (बातमीदार) : शितलादेवी व हनुमान मंदिर देवस्थान ट्रस्ट, केळवे ग्रामपंचायत, सागरी पोलिस ठाणे आणि कालिकादेवी मंदिर देवस्थान ट्रस्ट यांच्या संयुक्त विद्यमाने नवरात्रोदरम्यान कायदा व सुव्यवस्थेच्या दृष्टीने नियोजनासाठी एक संयुक्त सभा शितलादेवी मंगलधाम येथे पार पडली. केळवे सागरी पोलिस ठाण्याच्या सहाय्यक निरीक्षक विजया गोस्वामी यांच्या मार्गदर्शनाखाली सूचना करण्यात आल्या. दर्शनासाठी महिलांना घेऊन येणाऱ्या मोठ्या बस या पुलनाका मार्गे सरळ कालिकादेवी मंदिर करून राखाडा मार्गे शितलादेवी मंदिराजवळील मोठ्या पार्किंगमध्ये येतील. भाविकांनी तिथेच बस खाली करून दर्शन घेऊन पुन्हा पार्क केलेल्या जागेवरील आपल्या बसमध्ये येऊन बसायचे आहे. मंदिरासमोर कुठलीही बस उभी करता येणार नाही. या बस वर्तक पाखाडीमार्गे पुढील प्रवासास रवाना होतील. प्रवासात अडथळा निर्माण होऊ नये, यासाठी असा एक मार्गी प्रवास मार्ग ठरविण्यात आला आहे. मुख्य प्रवेशाद्वारावरील गर्दीच्या नियोजनासाठी यंदा मंदिराच्या मुख्य प्रवेशद्वारातून भाविकांना प्रवेश असेल. दर्शन झाल्यावर भाविकांनी जुन्या प्रवेशद्वार मार्गे बाहेर निघण्याची व्यवस्था आहे.