‘तरे यांच्या नावावर राजकीय खेळ करू नका’
सकाळ वृत्तसेवा
ठाणे, ता. २१ ः दिवंगत अनंत तरे यांच्या नावाचा गैरवापर करून राजकारण करू नये, त्यांच्या योगदानाचा अपमान सहन केला जाणार नाही, असा थेट इशारा उद्धव सेनेच्या उपजिल्हा महिला संघटक आणि माजी नगरसेविका महेश्वरी तरे यांनी खासदार नरेश म्हस्केंना दिला. या वक्तव्यामुळे ठाण्यातील राजकीय वातावरण पुन्हा तापले आहे. साडेचार वर्षे अनंत तरे यांचे नाव कुणालाच आठवले नाही आणि आता अचानक त्यांची आठवण काढली जातेय. तुम्ही आमच्या दादांचे नाव घेतले तर खबरदार. अनंत तरे यांना बाळासाहेब ठाकरे यांनी उपनेतेपद दिले होते आणि त्यांनी तीन वेळा महापौरपद भूषवले, जे गिनिज रेकॉर्ड आहे. ठाण्याच्या राजकारणात सत्ता आणण्यात त्यांचा सिंहाचा वाटा होता, असे महेश्वरी तरे म्हणाल्या. तरे यांनी खासदारांना सल्ला दिला, की प्रतिष्ठित पदावर असून बोलताना जबाबदारीने बोला; गलिच्छ राजकारण करू नका, हवेत बाण सोडू नका. जर पुरावे असतील तर समोर मांडा. यावर उद्धव सेनेचे प्रवक्ते अनिश गाढवे यांनीही भर दिला, की, ठाण्याचे राजकारण म्हणजे समाजकारण. आनंद दिघे आणि बाळासाहेब ठाकरे यांनी येथे शिस्त लावली.