खाडीत उडी मारणारे बचावले
ठाणे, ता. २२ : वांगणी येथील अविनाश गोविंद उतेकर (४३) यांनी कशेळी ब्रिजवरून खाडीत उडी मारली. ते बचावले असले तरी गंभीर जखमी झाले आहेत. त्यांच्या चेहऱ्याला आणि नाकाला गंभीर दुखापत झाली असून, त्यांना कळवा येथील छत्रपती शिवाजी महाराज रुग्णालयात दाखल करण्यात आले आहे. ही घटना सोमवारी मध्यरात्री सुमारे पावणेतीन वाजता घडली. ठाणे महापालिका आपत्ती व्यवस्थापन कक्षाला खाडीत उडी मारल्याची माहिती मिळताच ठाणे महापालिकेचे अग्निशमन दल आणि नारपोली पोलिस घटनास्थळी दाखल झाले. स्थानिक नागरिकांच्या मदतीने अविनाश यांना बाहेर काढण्यात आले. गंभीर जखमांमुळे त्यांना तातडीने रुग्णालयात उपचारासाठी नेण्यात आले आहे. नारपोली पोलिस या प्रकरणाचा पुढील तपास करीत आहेत, अशी माहिती आपत्ती व्यवस्थापन कक्षाने दिली आहे.