शाहूनगर दवाखाना पूर्ण वेळ खुला
धारावी, ता. २२ (बातमीदार) : स्थानिक पातळीवर स्थानिकांना आरोग्य सुविधा मिळाव्यात, यासाठी पालिकेकडून दवाखाने चालवले जात आहेत. धारावीतील प्रत्येक वॉर्डात एक असे सात वॉर्डात सात दवाखाने आहेत. सकाळी ९ ते दुपारी ४ वाजेपर्यंत हे दवाखाने उघडे असतात. धारावीतील शाहूनगर येथील दवाखान्यात सकाळी साडेनऊ ते साडेअकरा वाजेपर्यंतच केसपेपर दिला जात होता. त्यानंतर आलेल्या रुग्णांना परत पाठवले जात असल्याचा धक्कादायक प्रकार उघडकीस आला होता. याबाबतचे वृत्त ‘सकाळ’च्या १७ सप्टेंबरच्या अंकात प्रकाशित करण्यात आले होते. याची दखल घेत दिवसभर केसपेपर देणे सुरू केले आहे. त्‍यामुळे स्थानिक रहिवासी व रुग्ण समाधान व्यक्त करत आहेत.
ताप, सर्दी, खोकला, जुलाब, उलट्या आदी आजारांवर या दवाखान्यात उपचार केले जातात. त्‍यामुळे गरीब रुग्ण दवाखान्यात उपचार घेण्यासाठी पसंती देतात. खासगी डॉक्टरकडे गेल्यास खर्च येत असल्याने पालिकेच्या दवखान्यात किरकोळ आजारासाठी मोठी गर्दी असते. दवाखाना पूर्णवेळ सुरू झाल्‍याने रहिवासी मोतीराम सावळे यांनी समाधान व्यक्‍त केले.