पोलिस असल्याचे सांगत आजीला लुबाडले
सकाळ वृत्तसेवा
ठाणे, ता. २२ : नातवाला शाळेतून पायी घरी घेऊन जाताना दोन अनोळखी इसमांनी पोलिस असल्याची बतावणी करत ६७ वर्षीय आजीबाईंच्या गळ्यातील सोनसाखळी हातचलाखीने घेऊन पोबारा केला आहे. हा प्रकार कळव्यात घडला असून, याप्रकरणी त्या दोघांविरोधात गुन्हा दाखल करण्यात आला आहे. आजीबाई शनिवार, (ता २०) दुपारी १२ वाजण्याच्या सुमारास नातवाला शाळेतून घेऊन घरी जात होत्या. त्या वेळी वाटेत एका झाडाखाली दोन इसम त्यांना भेटले. त्यांनी आम्ही पोलिस आहोत, असे सांगितले. तसेच गळ्यातील सोनसाखळी काढा, येथे चोऱ्या होतात. त्यामुळे आजीबाईंनी गळ्यातील सोनसाखळी काढून त्या दोघांकडे दिली. त्यांनी एका कागदामध्ये गुंडाळून पिशवीमध्ये टाकली असे भासवून हातचलाखीने सोनसाखळी घेऊन पोबारा केला. ती सोनसाखळी २६ ग्रॅम वजनाची असून, तिची किंमत दीड लाख रुपये असल्याचे तक्रारीत नमूद करण्यात आले आहे. याप्रकरणी कळवा पोलिस ठाण्यात गुन्हा दाखल करण्यात आला असून, पुढील तपास वरिष्ठ पोलिस निरीक्षक अशोक उतेकर यांच्या मार्गदर्शनाखाली सुरू आहे.