नवरात्रीच्या मुहूर्तावर वाहन खरेदी जोमात
तुर्भे, ता. २२ (बातमीदार) : पितृपक्ष संपताच नवरात्रीला सुरुवात झाली असून, हा चैतन्याचा सण म्हणून ओळखला जातो. या मुहूर्तावर बाजारात खरेदीसाठी लगबग वाढली आहे. कपडे, इलेक्ट्रॉनिक वस्तूंसह दुचाकी आणि चारचाकी गाड्यांचीही मोठ्या प्रमाणात बुकिंग करण्यात आली आहे. पितृपक्ष सुरू झाल्यानंतर कोणतेही शुभ काम केले जात नाही. त्यामुळे नवरात्री सुरू होताच नागरिकांकडून बुकिंग जोरात सुरू झाली आहे, तर साडेतीन मुहूर्तांपैकी एक असलेल्या दसऱ्याच्या मुहूर्तावर अधिकाधिक नव्या वस्तूंची खरेदी केली जाते.
नवरात्रोत्सवाचा मुहूर्त साधत नवी मुंबईकरांनी दुचाकी आणि चारचाकी वाहनांची जोरदार खरेदी केली आहे. त्यामुळे वाहन बाजारात चांगलीच तेजी अनुभवास आली. इलेक्ट्रॉनिक वस्तूंच्या खरेदीकडे नागरिक वळत असल्याने इलेक्ट्रॉनिक बाजारातही चैतन्याचे वातावरण अनुभवास येत आहे. बाजारात नवनवीन वाहनाच्या मॉडेल व कंपन्यांच्या चारचाकी वाहनाची रेकॉर्ड ब्रेक बुकिंग झाली आहे, शिवाय काही विक्रेत्यांकडे नवरात्रीसाठी विशेष खरेदी ऑफर्स उपलब्ध आहेत. त्यामुळे बाजारात चैतन्य आले असून, कोट्यवधी रुपयांची उलाढाल होत असल्याचे दिसून येत आहे. सध्या चारचाकी आणि दुचाकी बाजारात पूर्वीच्या तुलनेत १५ ते २० टक्क्यांनी वाढ झाली आहे.