व्यावसायिकाला डांबून ठेवत मारहाण
नवी मुंबई (वार्ताहर): आयात-निर्यात व्यवहारातील पैशांच्या वादातून रबाळे येथील व्यावसायिकाला ओळखीतील टोळक्याने मुंबईच्या मालवणी परिसरात पाच तास डांबून ठेवत मारहाण केली. त्याच्याकडून ७१ हजारांची रक्कमही उकळली. रबाळे पोलिसांनी या टोळीविरोधात गुन्हा दाखल केला असून, पुढील तपासासाठी प्रकरण मालवणी पोलिसांकडे वर्ग केले. तक्रारदार अनिकेत थोरात (३१) यांचा अदनान अन्सारी, झिशान सिद्दीकी, संजय व स्नेहल कुडाळकर व त्यांच्या इतर दोन अनोळखी साथीदारांसोबत व्यवसाय सुरू होता. अनिकेत आरोपींचे पैसे देण्यास टाळाटाळ करीत असल्याने त्याला २० सप्टेंबरला एका बैठकीच्या निमित्ताने मालाडला बोलावले. तिथे एका घरात डांबून बेदम मारहाण केली आणि सिगारेटचे चटकेही दिले. अनिकेतजवळील एटीएममधून ४० हजार रुपये रोख आणि ऑनलाइन ३१ हजार रुपये उकळले. तसेच मोबाईल फॉरमॅट करून पुरावे नष्ट केल्यानंतर पाच तासांनी त्याची सुटका केली. रुग्णालयात उपचार घेतल्यानंंतर रबाळे पोलिस ठाण्यात तक्रार दाखल केली. पुढील तपास मालवणी पोलिस करीत आहेत.