आता रिकामे ठेवू नका,
काहीतरी काम द्या!
धनंजय मुंडेंची सुनील तटकरेंकडे मागणी
मुंबई, ता. २२ ः प्रदेशाध्यक्ष सुनील तटकरे यांनी आम्हाला कायम मार्गदर्शन करीत राहावे. काही चुकले तर कान धरावा; पण आता रिकामे ठेऊ नका, काहीतरी जबाबदारी द्या, अशी मागणी माजी मंत्री धनंजय मुंडे यांनी केली. कर्जत येथील एका कार्यक्रमात तटकरे यांच्यासमक्ष त्यांनी ही मागणी केल्याने राजकीय वर्तुळात चर्चा रंगली आहे.
तटकरे यांनी मला वडिलांचा आधार दिला. कोकणाचा विकासपुरुष म्हणून त्यांच्याकडे पाहिले जाते. त्यांचे वय आमच्यापेक्षा अजून तरुण आहे. मी सुनील तटकरे यांच्यामुळे उभा आहे. त्यांनी आम्हाला कायम मार्गदर्शन करत राहावे. चुकले तर कान धरावा, पण आता रिकामं ठेवू नका. काहीतरी जबाबदारी द्या,अशी मागणी मुंडे यांनी या कार्यक्रमात केली. मुंडेंच्या या विधानाची सध्या राजकीय वर्तुळात चर्चा रंगली असून, त्यावर तटकरेंनी याबाबत वरिष्ठच योग्य निर्णय घेतील, असे स्पष्ट केले.