तारापूर, ता. २३ (बातमीदार) : मुरबे येथे बारमाही बंदराची निर्मिती केली जाणार आहे. जेएसडब्ल्यू मुरबे पोर्ट कंपनीने २१ जुलै रोजी या प्रकल्पाचा मसुदा पर्यावरण मूल्यांकन अहवाल महाराष्ट्र प्रदूषण नियंत्रण मंडळाला सादर केला आहे. वाढवणपाठोपाठ मुरबे बंदरामुळे समुद्रातील मत्स्यउत्पादनावर परिणाम होऊन मच्छीमार समाज उद्ध्वस्त होण्याची भीती व्यक्त करण्यात येत आहे. मच्छीमार समाजासोबतच आता आमदार विनोद निकोले यांनी मुरबे बंदराच्या उभारणीला विरोध केला आहे.

पालघर येथे ऑक्टोबरमध्ये जनसुनावणी होणार आहे; मात्र या बंदराला मुरबे, नांदगाव, आलेवाडी, नवापूर, दांडी, सातपाटी, शिरगाव, वडराई या गावांतील मच्छीमार समाजाचा तीव्र विरोध आहे. या बंदराची जनसुनावणी रद्द करण्याची मागणी निकोले यांनी केली आहे. बंदरविरोधातील आंदोलनात मार्क्सवादी कम्युनिस्ट पक्ष मच्छीमार समाजाच्या पाठीशी असल्याची ग्वाही त्यांनी दिली.