बोईसर, ता. २३ (बातमीदार) : बोईसरजवळील पास्थळ येथील इमारतीत एका तरुणाचा मृतदेह सापडल्याने खळबळ उडाली होती. बालाजी कॉम्प्लेक्स या इमारतीमधील तळमजल्यावर रक्ताच्या थारोळ्यात हरिश सुखाडिया याचा मृतदेह सापडला होता. तारापूर पोलिस ठाण्यात गुरुवारी (ता. ४) गुन्हा दाखल करण्यात आला होता. याप्रकरणी पोलिसांनी दोघांना अटक केली आहे. सुरेंद्र चंद्र सिंह (वय ३४) आणि रेखा दुर्गादास वैष्णव (२५, दोन्ही रा. परनाळी, पालघर, मूळ रा. राजस्थान) हे दोघे फरार झाल्याने त्यांनीच गुन्हा केल्याची शक्यता वर्तवण्यात येत होती. पालघर स्थानिक गुन्हे शाखेच्या पथकाने राजस्थान, मध्य प्रदेश व गुजरातमध्ये संशयितांचा शोध घेतला होता. अखेर तांत्रिक माहितीच्या आधारे सुरेंद्र चंद सिंग आणि रेखा यांना गुजरातमधील वापी येथे ताब्यात घेतले. त्यांची चौकशी केली असता प्रेमसंबंधातून गुन्हा केल्याची कबुली दिली.