नवरात्रोत्सवात नारळाला ‘भाव’
बदलत्या हवामानामुळे आवक घटली
वाशी, ता. २३ (बातमीदार) ः पितृपक्ष संपताच नवरात्रोत्सवात घटस्थापना, होम-हवन, देवीची ओटी भरणे तसेच दसऱ्याच्या दिवशी नारळाला अधिक मागणी असते, मात्र बदलत्या हवामानामुळे आवक घटल्याने बाजारात नारळाचा भाव वधारला आहे.
मुंबई कृषी उत्पन्न बाजार समितीत नारळाला प्रति क्विंटल ३,०५० तर कमाल ६,३०० रुपयांचा भाव आहे. नवरात्रोत्सवात घटस्थापना, सार्वजनिक मंडळांच्या पूजेसाठी नारळाला अधिक मागणी असते. परिणामी आवक घटल्याने भाव वधारले आहेत. किरकोळ बाजारात लहान नारळासाठी ३५ ते ४० रुपये, तर मोठ्या नारळासाठी ५० ते ५५ रुपये मोजण्याची वेळ ग्राहकांवर आली आहे, तर काही ठिकाणी भाव ६० रुपयांपर्यंत गेल्याचे विक्रेत्यांचे म्हणणे आहे. वाहतुकीचे तसेच इतर खर्च वाढल्याने किरकोळ भावात चढ-उतार होत आहे.
----------------------------------
भाववाढीचा आरोप
महाराष्ट्रासह दक्षिणेकडील राज्यांतून नवी मुंबई बाजारात नारळांची आवक होत असते, मात्र यंदा पावसाचा अनियमितपणा, बदलत्या हवामानाचा उत्पादनावर परिणाम झाला आहे. आवक कमी होत असल्याने व्यापाऱ्यांनी भाव वाढवल्याचा आरोप ग्राहकांकडून होत आहे.