सीएसएमटी स्थानकाबाहेर अवैध पार्किंग
वाहतूक पोलिसांचे कारवाईकडे दुर्लक्ष
कुलाबा, ता. २३ ः छत्रपती शिवाजी महाराज टर्मिनसलगत असलेल्या मुंबई महापालिका मुख्यालयाखाली फिरोजशहा मेहता यांच्या पुतळ्याच्या आजूबाजूला मोठ्या प्रमाणात अवैध पार्किंग सुरू आहे. संपूर्ण मुंबई शहरातील वाहतुकीचे नियंत्रण करणाऱ्या पोलिसांना ही अवैध पार्किंग का दिसत नाही, असा सवाल मुंबईकरांनी केला आहे.
सीएसएमटी स्थानकाबाहेर भुयारी मार्गातून आल्यानंतर बेकायदा वाहन पार्किंग दिसते. पालिका मुख्यालयासमोरच ही अवैध पार्किंग गेल्या काही दिवसांपासून सुरू आहे. मुंबई महापालिका मुख्यालयात कामासाठी येणारे नागरिक बिनधास्तपणे आपली वाहने उभी करून निघून जातात. या पार्किंगमुळे सीएसएमटी स्थानकाबाहेरील सौंदर्यात बाधा निर्माण होत आहे. या मार्गाने येणारे प्रवासी हे काळबादेवी किल्ला कोर्ट मेट्रो सिनेमा व क्रॉफर्ड मार्केटला जाण्यासाठी प्रवास करतात. तसेच सीएसएमटी येथे नव्याने सुरू होणाऱ्या मेट्रोस्थानकाच्या प्रवेशद्वारावरदेखील बेकायदा वाहतूक केलेली दिसून येत आहे. या वाहनांमुळे चालण्यात अडथळे निर्माण होत असल्याची तक्रार पादचाऱ्यांनी केली आहे.

या पार्किंगमुळे पालिकेच्या सौंदर्यात बाधा निर्माण होत आहे. फिरोजशहा मेहता यांच्या पुतळ्यासमोर सेल्फी पॉइंटदेखील आहे. या ठिकाणी मोठ्या प्रमाणात सेल्फी घेण्यासाठी गर्दी करतात. वाहतूक पोलिसांनी याकडे लक्ष देऊन संबंधितांवर कारवाई करावी.
- कृष्णा शेट्टी, प्रवासी

लोकलमधील गर्दीनंतर कसेबसे आम्ही रेल्वेस्थानकाबाहेर येतो. त्या अशाप्रकारे विविध वाहने उभी केलेली असतात. या रस्त्यावरून चालणे कठीण होत आहे. वाहतूक पोलिसांनी वाहनचालकांवर दंडात्मक कारवाई करावी.
- सतीश पालांडे, पादचारी

न्यायालयाच्या आदेशानुसार मुंबई महापालिका मुख्यालय परिसर व छत्रपती शिवाजी महाराज टर्मिनससमोरील रस्त्यावर बेकायदा उभ्‍या असलेल्या वाहनांवर दंडात्मक कारवाई करतो. सातत्‍याने कारवाई केली जाते.
- मुकुंद खरात, वाहतूक पोलिस अधिकारी, आझाद मैदान पोलिस ठाणे