मराठवाड्यातील पूरग्रस्तांना रोह्यातून मदत
सह्याद्री वन्यजीव प्राणी संरक्षणार्थ संस्थेचे पथक दाखल
रोहा, ता. २३ (बातमीदार) ः मुसळधार पावसामुळे राज्यातील बहुतांश भागांत पूरस्थिती गंभीर झाली आहे. मराठवाड्यातील अनेक जिल्ह्यांमध्ये अतिवृष्टीमुळे जनजीवन विस्कळित झाले आहे. पुराच्या पाण्याने अनेक गावांना वेढा घातल्याने अनेक गावांचा संपर्क तुटला असून अशा गावांमधील बचावकार्यात रोह्यातील सह्याद्री वन्यजीव प्राणी संरक्षणार्थ सदस्यही सहभागी झाले आहेत.
मराठवाड्यातील सोलापूर जिल्ह्यातील माडा तालुक्यातील लहू गाव, धाराशिव भागात पडलेल्या अतिमुसळधार पावसामुळे दाणादाण उडाली आहे. या पावसाचा सर्वाधिक फटका शेतकऱ्यांना बसला आहे. खरीप हंगामातील हातातोंडाशी आलेले उभे पीक एकीकडे पावसाने मातीमोल केले आहे. तर दुसरीकडे मुसळधार पावसाने अनेक भागांत पुरात अडकलेल्या नागरिकांसाठी एनडीआरएफ जवानांच्या खांद्याला खांदा लावून सागर दहिंबेकर यांच्या नेतृत्वातील रोह्यातील सह्याद्री वन्यजीव प्राणी संरक्षणार्थ संस्थेतील तरुण झटत आहेत. या पथकाने धाराशिव, लहू गावात अडकलेल्या शेकडो तरुणांना जीवाची बाजी लावून मदतकार्य सुरू ठेवले आहे.