भिवंडीत महिलेवर अत्याचार
भिवंडी, ता. २३ (बातमीदार) : प्रवासादरम्यान झालेल्या महिलेच्या ओळखीचा गैरफायदा घेत अत्याचार करणाऱ्या आरोपीला पोलिसांनी गजाआड केले आहे. महेश गोपी ऊर्फ पिंट्या (३२) असे अटक केलेल्या आरोपीचे नाव असून तो कोंबडपाडा येथे राहत आहे. त्याने शिवाजी चौक ते माणकोलीदरम्यान बसमध्ये झालेल्या ओळखीचा फायदा घेत पीडित महिलेला खासगी फोटो व्हायरल करण्याची धमकी देत महिलेसोबत वज्रेश्वरी आणि गणेशपुरी येथे अत्याचार केले. तसेच पीडितेने नकार दिला असता तिला मारहाण करीत अश्लील शिवीगाळ केली. दरम्यान, तिचे अश्लील फोटो व व्हिडिओ काढले. ते व्हायरल करण्याची धमकी देत महिलेशी जबरदस्तीने शारीरिक संबंध ठेवले. त्याने ऑक्टोबर २०२४ पासून अत्याचार केल्याची तक्रार महिलेने निजामपूर पोलिस ठाण्यात दिली आहे. त्यानंतर पोलिसांनी महेश ऊर्फ पिंट्या यास पोलिसांनी अटक केली आहे.