विकसकांविरोधात कारवाई नाही;
फेरीवाल्यांवर कारवाई तत्परतेने!
महापालिकेच्या कृतीवर न्यायालयाची नाराजी
सकाळ वृत्तसेवा
मुंबई, ता. २४ ः न्यायालयाच्या आदेशानंतरही महापालिका विकसकांविरोधात कारवाई करत नाही; मात्र फेरीवाल्यांवर तत्परतेने कारवाई करते, असा टोला उच्च न्यायालयाने नुकताच लगावला.  मुलुंड (पूर्व) येथील फेरीवाल्यांची बाजू ऐकून न घेता त्यांच्याविरोधात कारवाई करणाऱ्या महापालिका प्रशासनाच्या कारवाईबाबत आणि फेरीवाल्यांना पर्यायी जागा उपलब्ध करण्याबाबत स्पष्टीकरण देण्याचे आदेशही महापालिकेला दिले.
फेरीवाल्यांनी सादर केलेल्या निवेदनावर विचार करा, असे आदेश असतानाही दुसऱ्या दिवशी या फेरीवाल्यांना हटवण्याची कारवाई महापालिकेने केली. त्यामुळे फेरीवाल्यांनी उच्च न्यायालयात याचिका केली होती. न्या. महेश सोनक आणि न्या. अद्वैत सेठना यांच्या खंडपीठाने याचिकेची दखल घेऊन महापालिकेच्या कारवाईवर प्रश्न उपस्थित केले. अनेक प्रकरणांमध्ये न्यायालयाच्या आदेशांचे पालन करीत नाही. विशेषतः बांधकाम व्यावसायिकांवर कारवाईच्या मागणीसाठी याचिकाकर्त्यांना महापालिका प्रशासनाविरुद्ध अवमान याचिका दाखल करण्यास भाग पाडले जाते, अशी टिप्पणी न्यायालयाने केली. तसेच महापालिकेने घाईघाईत याचिकाकर्त्याच्या दुकानांवर कारवाई केली. परिणामी, त्यांना निवेदन सादर करण्यासाठी मुदतही दिली नाही. त्यामुळे महापालिकेचा युक्तिवाद आणि याच कारणास्तव याचिकेला विरोध करणे चुकीचे असल्याचेही न्यायालयाने म्हटले.