पदोन्नतीसाठी शिक्षकाचे आमरण उपोषण
पालघर, ता. २५ (बातमीदार) ः सेवाज्येष्ठतेची पायमल्ली झाल्याचा आरोप करीत शिक्षक भारतीचे पालघर जिल्हाध्यक्ष अनिल शेलार यांनी उपोषणाचा पवित्रा घेतला आहे. मुख्याध्यापकपद मिळत नसल्याच्या निषेधार्थ अनिल शेलार २ ऑक्टोबरपासून वाडा तहसील कार्यालयासमोर उपोषणास बसणार आहेत. त्यांनी संबंधित शिक्षणाधिकारी व शासकीय कार्यालयांना याबाबत पत्र सादर केले आहे.
नेहरोली परिसर शिक्षण संस्थेच्या खैरे आंबिवली येथील श्रीमती सुरेखा एच. गार्डी स्वजन विद्यालयात कार्यरत असलेले शेलार हे सरकारच्या परिपत्रकानुसार सेवाज्येष्ठ असूनही, त्यांना डावलून कनिष्ठ शिक्षकाचा पदोन्नतीसाठी प्रस्ताव दिल्याचा आरोप त्यांनी संस्थेवर केला आहे. त्यांनी यासंदर्भात तक्रार दाखल करीत वकिलामार्फत नोटीसही बजावली आहे. विभागीय चौकशी करून आपल्याला न्याय मिळावा, अशी मागणी त्यांनी केली आहे.

अनिल शेलार हे कलाशिक्षक आहेत व त्यांच्या अनेक तक्रारी आहेत. त्यामुळे संस्थेने नियमाप्रमाणे ठराव करून सेवाज्येष्ठतेनुसार मुख्याध्यापकपदी पदोन्नतीसाठी शिक्षणाधिकाऱ्याकडे प्रस्ताव पाठविला आहे. त्यांच्यावर अन्याय केलेला नाही.
- विष्णू पाटील, सचिव, नेहरोली परिसर शिक्षण मंडळ, वाडा