चित्रकला ग्रेड परीक्षेला उत्स्फूर्त प्रतिसाद
कासा (बातमीदार) ः दरवर्षी महाराष्ट्र राज्य कला संचालनालयामार्फत रेखाकला एलिमेंटरी व इंटरमिजिएट ग्रेड परीक्षांना यावर्षीही विद्यार्थ्यांचा मोठा प्रतिसाद मिळाला आहे. या परीक्षांना बुधवार (ता. २४) पासून सुरुवात झाली असून, चार दिवस परीक्षा होणार आहेत.
या वर्षी परीक्षार्थींची संख्या लक्षणीयरीत्या वाढली आहे. अनेक केंद्रांवर विद्यार्थ्यांना बसविण्यासाठी केंद्रचालकांना विशेष मेहनत घ्यावी लागत आहे. एलिमेंटरी परीक्षा दोन दिवस चालणार असून, पुढील दोन दिवस इंटरमिजिएट परीक्षा होणार आहे. यामुळे परीक्षा केंद्र असलेल्या शाळांना नियमित वर्गांसोबतच बैठकीची अतिरिक्त व्यवस्था करावी लागत आहे.
सहावी ते आठवीचे विद्यार्थी एलिमेंटरी परीक्षेला तर आठवी ते दहावीचे विद्यार्थी इंटरमिजिएट परीक्षेला बसतात. बाह्य विद्यार्थ्यांनाही संधी दिली जाते. या परीक्षेतील गुणांचा शैक्षणिक प्रगतीसाठी फायदा होत असल्याने विद्यार्थ्यांचा कल वाढतो आहे. दहावी-बारावीनंतर पुढील अभियांत्रिकी व इतर उच्च शिक्षणासाठी प्रवेश प्रक्रियेमध्ये या परीक्षेचा फायदा होतो. डहाणू तालुक्यात यंदा पाच परीक्षा केंद्रे असून, मोठ्या संख्येने विद्यार्थी सहभागी झाले आहेत. कासा येथील आचार्य भिसे विद्यालयात एलिमेंटरी परीक्षेला ३१९ विद्यार्थी, तर इंटरमिजिएट परीक्षेला २०० विद्यार्थी बसले आहेत.