उल्हासनगर, ता. २५ (बातमीदार) : गृहनिर्माण व शहरी कार्य मंत्रालय आणि नगर परिषद प्रशासन संचालनालयाच्या निर्देशानुसार पंतप्रधान पथविक्रेता आत्मनिर्भर निधी या योजनेला २०३० पर्यंत मुदतवाढ देण्यात आली आहे. त्यामुळे उल्हासनगरातील फेरीवाले आणि छोटे व्यावसायिकांना अत्यल्प व्याजदरासह विविध सुविधा घेण्याचा मार्ग मोकळा झाला आहे. यासंदर्भात उपायुक्त अनंत जवादवार यांच्या अध्यक्षतेखाली शुक्रवारी (ता. २६) लोककल्याण मेळावा होणार आहे.
योजनेअंतर्गत पथविक्रेत्यांना प्रथम कर्ज रु. १५,००० रुपये, द्वितीय कर्ज २५ हजार रुपये, तृतीय कर्ज ५० हजार रुपये अशा तीन स्तरात कर्ज उपलब्ध आहे. याशिवाय, नियमित परतफेडीस प्रोत्साहन देणे, डिजिटल व्यवहारास प्रोत्साहन देणे; तसेच पथविक्रेत्यांचे सामाजिक-आर्थिक सर्वेक्षण करून आठ विविध योजनांचा लाभ देण्यात येणार आहे. योजना संदर्भात माहिती देण्यासाठी आयुक्त मनीषा आव्हाळे यांच्या आदेशान्वये लोककल्याण मेळावा घेण्यात येणार आहे. या मेळाव्यात पथविक्रेत्यांचे नवीन अर्ज भरणे, मंजूर झालेल्या कर्ज प्रकरणांचे वितरण करणे, डिजिटल व्यवहाराबाबत प्रशिक्षण देणे; तसेच अन्न पदार्थ विक्री करणाऱ्या पथविक्रेत्यांना विशेष प्रशिक्षण देण्यात आले. उपायुक्त जवादवार यांनी पथविक्रेत्यांना या योजनेचा जास्तीत जास्त लाभ घेण्याचे आवाहन केले. योजनेच्या अंमलबजावणीसाठी अधिकारी संजीवनी अमृतसागर, दिनेश सावरकर आणि तुषार पवार कार्यरत आहेत, असे जनसंपर्क अधिकारी अजय साबळे यांनी सांगितले.