सरकारी नोकरीच्या प्रलोभनाने तरुणाची फसवणूक
मृत्यूनंतर उघडकीस आले प्रकरण; गुन्हा दाखल
बोईसर, ता. २५ (बातमीदार) : मंत्रालयात सरकारी नोकरी लावून देण्याच्या प्रलोभनाने विक्रांत केशव ठाकरे (वय २४) याची २.२० लाख रुपयांची फसवणूक झाल्याचे प्रकरण त्याच्या मृत्यूनंतर उघडकीस आले आहे. याप्रकरणी विक्रांतची बहीण मयूरी लाटे हिने बोईसर पोलिस ठाण्यात सौरभ आप्पा नावाच्या युवकाविरोधात गुन्हा दाखल केला आहे.
विक्रमगड येथील विक्रांतची ओळख २०२३मध्ये मोहित पवार यांच्या माध्यमातून सौरभ आप्पाशी झाली होती. सौरभने स्वतःची मंत्रालयात मोठी ओळख असल्याचे भासवून विक्रांतला लिपिक पदावर नोकरी देण्याचे प्रलोभन दाखवले. त्यासाठी त्याने त्याच्याकडून २.२० लाख रुपये घेतले. त्याने दोन वेळा विक्रांतला मंत्रालयात नेत बाहेर बसवून ठेवले आणि ‘साहेब उपलब्ध नाहीत. त्यामुळे नियुक्तीपत्र मिळणार नाही’ अशी कारणे दिली. सातत्याने होणारी फसवणूक व मानसिक तणावामुळे विक्रांतचा २१ मार्च २०२४ रोजी बोईसरहून घरी परत येत असताना झालेल्या एका अपघातात मृत्यू झाला.
भावाच्या मृत्यूनंतरही सौरभने पैसे परत केले नाहीत. त्याने खात्यात पुरेसे पैसे नसतानाही चेक देऊन वेळ मारून नेण्याचा प्रयत्न केला. अखेर मयूरी लाटे यांनी बोईसर पोलिस ठाण्यात तक्रार दाखल केली. याप्रकरणी अधिक तपास पोलिसांकडून सुरू आहे.