भिवंडी, ता. २५ (वार्ताहर) : महापालिका आयुक्त अनमोल सागर यांच्या आदेशान्वये व पाणीपुरवठा विभागाचे मुख्य अभियंता संदीप पटणावर यांच्या मार्गदर्शनाखाली पथकाने गुरुवारी (ता. २५) शहरात पाणीचोरी करणाऱ्या चार जणांविरोधात कारवाई केली. या कारवाईत भोईवाडा पोलिस ठाण्यात विविध कलमांन्वये गुन्हे दाखल करण्यात आले.
पहिल्या घटनेत धोबी तलाव क्रीडांगणामागील रोशन बाग परिसरात आसिफ शेख याने विनापरवानगी रस्ता खोदून इमारतीसाठी सांडपाणी वाहिनी टाकण्याचे काम केले. यातून रस्त्याचे ९८ हजार रुपयांचे नुकसान झाले. दुसऱ्या प्रकरणात केसर बाग येथे नसीम अख्तर अन्सारी आणि प्लंबर मुमताज अन्सारी यांनी संगनमताने पालिकेच्या जलवाहिनीला छिद्र पाडून प्रत्येकी १२ हजार रुपये दराने सात जोडणी घेतली. यातून पालिकेचे ८४ हजार रुपयांचे नुकसान झाले. तिसऱ्या घटनेत दर्गा रोड चार चाळ येथे समीर मोहम्मद यूसुफ मोमीन याने पाच बेकायदा नळजोडणीतून ६० हजार रुपयांचे नुकसान झाल्याचे निष्पन्न झाले. पाणीचोरीविरोधातील या कारवाईत उपअभियंता सरफराज अन्सारी, विराज भोईर, पथकप्रमुख नफीस मोमीन, सहाय्यक पथक प्रमुख सहभागी होते.