कारने तरुणीला फरपटत नेले
भाईंदर, ता. २५ (बातमीदार) : भाईंदर पश्चिममध्ये बुधवारी (ता. २४) रात्री एका कारचालकाने धडक दिल्यानंतर जाब विचारणाऱ्या २२ वर्षीय तरुणीला फरपटत नेल्याची घटना घडली. या घटनेत तरुणी जखमी झाली असून, पोलिस आरोपी कारचालकाचा शोध घेत आहेत.
गरबा खेळून परत जात असताना भरधाव आलेल्या एका कारने तरुणीला धडक दिली. कारचालकाला जाब विचारण्यासाठी ती कारजवळ गेली आणि तिने गाडीचे हँडल पकडले. या वेळी कारचालकाने तरुणीला शिवीगाळ करीत गाडी न थांबवता वेगाने पळ काढला.
हँडल पकडल्यामुळे तरुणी काही अंतर गाडीसोबत फरपटत गेली आणि नंतर रस्त्यावर पडली. तिच्या हातापायाला गंभीर जखमा झाल्या. ही घटना पाहून आसपासच्या लोकांनी कारचा फोटो काढला. तरुणीने तत्काळ भाईंदर पोलिस ठाण्यात तक्रार दाखल केली असून, पोलिसांनी दिलेल्या फोटोच्या आधारे पुढील तपास सुरू केला आहे.