आरोग्य सेवाव्रती पुरस्कार डॉ. दयानंद कुम्बला यांना जाहीर
ठाणे, ता. २६ ः डोंबिवली येथील वैद्यकीय मदत निधी न्यासाने या वर्षीचा आरोग्य सेवाव्रती पुरस्कार ठाण्यातील प्रसिद्ध हृदयविकारतज्ज्ञ डॉ. दयानंद कुम्बला यांना जाहीर झाला असल्याची माहिती न्यासाचे अध्यक्ष डॉ. विश्वास पुराणिक यांनी दिली. हा पुरस्कार वितरण सोहळा रविवारी (ता. २८) सकाळी ११ वाजता ठाण्यातील सहयोग मंदिर हॉलमध्ये होणार आहे. वैद्यकीय क्षेत्रातील त्यांच्या महत्त्वपूर्ण योगदानाबद्दल त्यांना हा पुरस्कार दिला जात आहे.
या कार्यक्रमाला आमदार संजय केळकर उपस्थित राहणार असून ‘पितांबरी’चे व्यवस्थापकीय संचालक रवींद्र प्रभुदेसाई यांच्या हस्ते पुरस्कार प्रदान केला जाईल. डॉ. कुम्बला गेल्या ३० वर्षांपासून ठाण्यात वैद्यकीय सेवा देत आहेत. त्यांनी सुरू केलेल्या ‘डॉक्टर तुमच्या भेटीला’ या उपक्रमातून त्यांनी अनेक नामवंत डॉक्टरांना व्याख्यानासाठी आमंत्रित केले आहे, ज्यामुळे सर्वसामान्यांना आरोग्याबद्दल योग्य माहिती मिळाली आहे. पुरस्कार सोहळ्यात डॉ. कुम्बला यांची ‘हृदय व आरोग्य’ या विषयावर विशेष मुलाखतही घेतली जाणार आहे. या सोहळ्यात विविध क्षेत्रांत उल्लेखनीय कार्य करणाऱ्या इतर व्यक्तींचाही सन्मान केला जाईल.