नरेश गोयल यांना दिलासा

बँक खाते फसवे ठरवण्याचा निर्णय रद्द 

सकाळ वृत्तसेवा
मुंबई, ता. २६ : जेट एअरवेजचे संस्थापक नरेश गोयल यांचे बँक खाते फसवे म्हणून वर्गीकृत करण्याचा बँक ऑफ इंडियाचा निर्णय उच्च न्यायालयाने नुकताच रद्द केला. या आधारावर केलेल्या सर्व कारवायाही न्या. रियाज छागला आणि आणि न्या. फरहान दुबाश यांच्या खंडपीठाने रद्द केल्या.

सुमारे ५३८.६२ कोटी रुपयांच्या कथित बँक फसवणुकीशी संबंधित आर्थिक गैरव्यहारप्रकरणी छापे टाकल्यानंतर सक्तवसुली संचालनालयाने (ईडी) २० जुलै २०२३ रोजी गोयल यांना अटक केली होती. गोयल यांच्यावर सार्वजनिक क्षेत्रातील अनेक बँकांची कोट्यवधी रुपयांची फसवणूक केल्याचे फौजदारी खटले सुरू आहेत.

कॅनरा बँकेने जेट एअरवेज इंडिया लिमिटेड, गोयल, त्यांची पत्नी अनिता, कंपनीचे माजी कार्यकारी जी. शेट्टी आणि इतर अनाेळखी सरकारी कर्मचाऱ्यांविरुद्ध तक्रार दाखल केल्यानंतर हे छापे टाकण्यात आले होते. केंद्रीय अन्वेषण विभागाने (सीबीआय) याप्रकरणी दाखल केलेल्या गुन्ह्यानुसार, एअरलाइनला ८४८.८६ कोटी रुपयांची क्रेडिट मर्यादा आणि कर्जे मंजूर केली होती. त्यापैकी ५३८.६२ रुपये कंपनीने परत केले नाहीत. त्यानंतर २९ जुलै २०२१ रोजी गोयल यांचे बँक खाते फसवे म्हणून वर्गीकृत केल्याचे जाहीर करण्यात आले.  या गुन्ह्याच्या आधारे ईडीने गोयल आणि त्यांच्या पत्नीविरुद्ध आर्थिक गैरव्यवहाराचे प्रकरण दाखल केले होते. तथापि, उच्च न्यायालयाने २०२३ मध्ये हे प्रकरण रद्द करून गोयल दाम्पत्याला दिलासा दिला होता.